راولپنڈی۔6مارچ (اے پی پی):پاک فوج کے سربراہ جنرل سید عاصم منیر نے عوام کی حفاظت کو یقینی بنانے کا اعادہ کرتے ہوئے کہا ہے کہ پاک فوج دہشت گردی کے خلاف سیسہ پلائی دیوار ہے۔
آئی ایس پی آر کے مطابق آرمی چیف جنرل سید عاصم منیر نے بنوں چھائونی پر خوارج کا حملہ ناکام بنانے کے بعد بنوں کا دورہ کیا جہاں پر آرمی چیف کو جاری آپریشنز، علاقے کی سکیورٹی صورتحال پر بریفنگ دی گئی۔ آرمی چیف نے سی ایم ایچ بنوں میں زخمی اہلکاروں کی عیادت کی۔آرمی چیف نے اہلکاروں کے غیر متزلزل عزم اور حوصلے کو سراہا۔
انہوں نے جوانوں کے بلند حوصلے اور ثابت قدمی کی ستائش کی۔آرمی چیف جنرل سید عاصم منیر نے کہا کہ پاک فوج دہشت گردی کے خلاف سیسہ پلائی دیوار کے طور پر اپنی خدمات جاری رکھے گی، مسلح افواج عوام کی حفاظت یقینی بنانے میں کوئی کسر نہیں چھوڑیں گی۔
آرمی چیف جنرل سید عاصم منیر نے کہا کہ شہریوں بشمول بچوں، خواتین اور بزرگوں کو بہیمانہ طور نشانہ بنانا خوارج کے اصل عزائم کو ظاہر کرتا ہے، دہشت گردی کے خلاف جنگ میں قومی یکجہتی ضروری ہے۔آرمی چیف نے بزدلانہ دہشت گرد حملے میں شہید شہریوں کے خاندانوں سے گہرے دکھ اور افسوس کا اظہار کیا اور کہا کہ واقعے میں ملوث ملزمان کو فوری طور پر جوانوں نے کیفر کردار تک پہنچایا تھا۔
آرمی چیف جنرل سید عاصم منیر نے کہا کہ حملے کے منصوبہ سازوں اور معاونین کو بھی جلد انصاف کے کٹہرے میں لایا جائے گا۔
Short Link: https://urdu.app.com.pk/urdu/?p=569574
