پاک فوج کا بارشوں اور سیلاب سے متاثرہ علاقوں بونیر، سوات ، شانگلہ اور باجوڑ میں فلڈ ریلیف آپریشن چوتھے روز بھی جاری

اسلام آباد۔18اگست (اے پی پی):پاک فوج کا خیبرپختونخوا کے بارشوں اور سیلاب سے متاثرہ علاقوں بونیر، سوات ، شانگلہ اور باجوڑ میں فلڈ ریلیف آپریشن چوتھے روز بھی جاری ہے،زیادہ تر متاثرہ علاقوں میں پیر کی صبح سے جاری شدید بارش کے باجود ریسکیو آپریشن کی کارروائیاں جاری ہیں ،پاک فوج کے ہیلی کاپٹرز میں سیلاب زدگان کو راشن اور دیگر سامان مہیا کیا جا رہا ہے جبکہ سیلاب زدہ علاقوں سے لوگوں کو محفوظ مقامات پر منتقل کرنے کا عمل بھی جاری ہے۔

پاک فوج کی کور آف انجینئرز کے دستے متاثرہ راستوں کی بحالی اور ملبہ ہٹانے میں مصروف ہیں۔کور آف انجینئرز کی اربن سرچ اینڈ ریسکیو ٹیم (یو ایس اے آر) بھی ملبے سے زخمیوں اور لاشوں کو ڈھونڈنے میں مصروف عمل ہے ۔

اسی طر ح پاک فوج کے ڈاکٹرز متاثرہ علاقوں میں میڈیکل کیمپس کے ذریعے مریضوں کے مفت علاج میں مصروف ہیں ۔واضح رہے کہ تمام متاثرہ افراد کو بحفاظت ریسکیو کرنے اور محفوظ مقامات پر منتقل کرنے تک آپریشن جاری رہے گا۔