راولپنڈی۔19مئی (اے پی پی):پاک فوج کی بلوچستان میں دو مختلف کارروائیوں کے دوران بھارتی پراکسی نام نہاد بلوچ لبریشن فرنٹ سے تعلق رکھنے والے تین دہشت گرد مارے گئے۔ آئی ایس پی آر کے مطابق سکیورٹی فورسز نے خفیہ اطلاعات کی بنیاد پر ضلع آواران کے علاقے گشکور میں بھارتی سرپرستی میں کام کرنے والے دہشت گردوں کی موجودگی کی اطلاع پر کارروائی کی۔
دوران آپریشن سکیورٹی فورسز نے دہشت گردوں کے ٹھکانے کو موثر انداز میں نشانہ بنایا۔ شدید فائرنگ کے تبادلے کے بعد بھارتی سرپرست دہشت گرد یونس ہلاک جبکہ دو دیگر دہشت گرد زخمی ہو گئے۔ایک اور کارروائی میں ضلع کیچ کے علاقے تربت شہر میں سکیورٹی فورسز نے کامیاب کارروائی کرتے ہوئے دو بھارتی سرپرست دہشت گردوں کو ہلاک کر دیا جن کی شناخت دہشت گرد نیٹ ورک کے سرغنہ صبر اللہ اور دہشت گرد امجد عرف بچھو کے طور پر ہوئی ہے۔
ہلاک دہشت گردوں سے اسلحہ، گولہ بارود اور دھماکہ خیز مواد بھی برآمد کیا گیا ہے۔ یہ دہشت گرد قانون نافذ کرنے والے اداروں پر حملوں اور معصوم شہریوں کی ٹارگٹ کلنگ سمیت کئی دہشت گرد کارروائیوں میں ملوث تھے۔علاقے میں کلیئرنس آپریشن جاری ہے تاکہ کسی بھی باقی ماندہ دہشت گرد کو ختم کیا جا سکے۔ آئی ایس پی آر کے مطابق پاکستان کی سکیورٹی فورسز قوم کے شانہ بشانہ بلوچستان میں امن، استحکام اور ترقی کو سبوتاژ کرنے کی بھارتی پراکسیز کی کوششوں کو ناکام بنانے کے لیے پرعزم ہیں۔
Short Link: https://urdu.app.com.pk/urdu/?p=599008
