لاہور۔10مئی (اے پی پی):وزیر اعلی پنجاب مریم نواز نے کہا ہے کہ پاک فوج کی بھارتی جارحیت کے خلاف عبرت ناک جوابی کارروائی پر پوری قوم کو فخر ہے۔ہفتہ کے روز آپریشن ”بنیان مرصوص”پر پاک فوج کے لیے اعزاز و افتخار کا اظہار کرنے کیلئے جاری اپنے ایک بیان میں انہوں نے کہا کہ پاکستان کا بھارتی جارحیت اور بزدلی کا دن کی روشنی میں دیا گیا جواب تاریخ میں سنہری حروف سے لکھا جائے گا،پاک فوج کی بھارتی جارحیت کیخلاف عبرت ناک جوابی کارروائی پر پوری قوم کو فخر ہے ،پاک سرزمین کے سپاہیو! تم پر ، تمہارے جذبے اور تمہاری غیرت کو سلام ہو ،سلام ہے ان محافظوں کو جنہوں نے صرف گولی سے نہیں بلکہ غیرت، حکمت اور شجاعت سے جواب دیا۔
مریم نواز نے کہا کہ آپریشن ”بنیان مرصوص ”جوابی کارروائی نہیں بلکہ تاریخی اعلان ہے کہ ہم کمزور نہیں صرف امن کے لیے خاموش تھے ،جب دشمن نے حد پار کی تو پاکستان نے صبر کو حکمت میں بدلااور کڑی ضرب دی۔ انہوں نے کہا کہ پاکستان کاایک ایک سپاہی مادرِ وطن کے تحفظ کی قسم کھا کر زندہ ہے ،پاکستان کی سرحدیں صرف خاردار تاروں سے ہی نہیں بلکہ شہیدوں کے لہو سے محفوظ ہیں ، امن کے خواہاں ضرور ہیں مگر جارحیت کا جواب خاموشی نہیں ضرب ہوتا ہے۔
Short Link: https://urdu.app.com.pk/urdu/?p=595244
