اسلام آباد۔22اگست (اے پی پی):پاک فوج کے دستے سندھ، بلوچستان اور پنجاب کے سیلاب زدہ علاقوں میں سول انتظامیہ کی مسلسل مدد کر رہے ہیں، فوج کے دستے ریسکیو اور امدادی سرگرمیوں میں مصروف ہیں اور لوگوں کو محفوظ مقامات پر منتقل کر رہے ہیں۔
آئی ایس پی آر کے مطابق آرمی میڈیکل ڈاکٹرز اور پیرا میڈیکل ٹیمیں سیلاب متاثرین کا علاج کر رہی ہیں۔ متاثرہ لوگوں میں راشن اور پکا ہوا کھانا بھی تقسیم کیاجارہا ہے ۔سندھ میں سیلاب متاثرین کی حفاظت کے لیے فوج کے دستے خیرپور سندھ کے ضلع صائم نالہ کے سیلاب سے متاثرہ علاقے میں پہنچ گئے۔ خیرپور سندھ کے علاقے صائم نالہ میں شدید سیلاب سے200 سے زائد مکانات بری طرح متاثر ہوئے۔
پنو عاقل گیریژن کے فوجی دستوں نے امدادی کارروائیوں میں حصہ لیا اور سیلاب سے متاثرہ افراد کو محفوظ مقامات پر منتقل کیا اور انہیں طبی امداد فراہم کی۔بلوچستان میں پاک فوج اور ایف سی کے دستے بلوچستان میں کوئٹہ، پشین، قلعہ سیف اللہ، زیارت، ژوب، لورالائی اور نوشکی میں سیلاب سے ریسکیو اور امدادی کارروائیوں میں سول انتظامیہ کی مدد جاری رکھے ہوئے ہیں۔
پاکستان آرمی، ایف سی، پی ڈی ایم اے اور سول انتظامیہ کی ٹیمیں لوگوں کو محفوظ مقامات پر منتقل کر رہی ہیں جہاں انہیں پکا ہوا کھانا اور دیگر سہولیات فراہم کی جا رہی ہیں۔ نصیر آباد، دکی اور لسبیلہ کے علاقوں میں ریلیف کیمپ قائم کیے گئے ہیں۔ متاثرہ علاقوں میں فوج اور ایف سی کے فری میڈیکل کیمپ بھی لگائے گئے ہیں جن میں مفت علاج اور ادویات بھی فراہم کی جاتی ہیں۔
مواصلات کے بنیادی ڈھانچے کو جلد از جلد بحال کرنے کی تمام کوششیں کی جا رہی ہیں۔ بین الاضلاعی روابط کے ساتھ ساتھ ژوب ڈی آئی خان روڈ کو بھی بحال کر دیا گیا ہے۔پنجاب میں وہاڑی، راجن پور اور ڈیرہ غازی خان میں فوج کے دستے امدادی سرگرمیاں اور متاثرہ آبادی کو طبی امداد فراہم کر رہے ہیں۔
