راولپنڈی ۔7مئی (اے پی پی):پاک فوج کے سربراہ جنرل سید عاصم منیر نے بدھ کو ائیر ہیڈکوارٹر کا دورہ کیا جہاں پر چیف آف ائیر سٹاف ائیر چیف مارشل ظہیر احمد بابر سدھو نے ان کا گرم جوشی سے استقبال کیا۔
آئی ایس پی آر کے مطابق آرمی چیف نے چیف آف ائیر سٹاف اور ائیر فورس کے شاہینوں کو بھارتی ائیر فورس کی طرف سے کی جانے والی جارحیت کے مذموم منصوبے کو فوراً ناکام بنانے پر خراج تحسین پیش کیا۔ آرمی چیف نے پاکستان ائیر فورس کو ایک بار پھر دشمن کے متعدد جہاز مار گرانے اور اپنا لوہا منوانے پر بے حد سراہا۔
آرمی چیف نے تینوں سروسز کے مابین بہترین تعاون کو بھی سراہا۔ملاقات کے دوران اس عزم کو دہرایا گیا کہ کسی کو بھی پاکستان کی جغرافیائی سالمیت کی خلاف ورزی نہیں کرنے دی جائے گی اور جو بھی اس کی کوشش کرے گا، اس کی قیمت ادا کرے گا۔
Short Link: https://urdu.app.com.pk/urdu/?p=594175
