اسلام آباد۔30نومبر (اے پی پی):پاکستان۔چین میری ٹائم ڈائیلاگ کا چوتھا دور جمعرات کو اسلام آباد میں ہوا، دونوں ممالک نے ابھرتے ہوئے خطرات اور چیلنجوں کا مشترکہ طور پر مقابلہ کرنے کے لیے عملی تعاون کو آگے بڑھانے کی ضرورت پر زور دیا اوردو طرفہ تبادلوں کی رفتار کو برقرار رکھنے اور دونوں ممالک کی بحری افواج کے درمیان تعلقات کو فروغ دینے پر اتفاق کیا۔ پاکستان کی وزارت خارجہ کے ڈائریکٹر جنرل (چین) محمد عامر خان اور چینی وزارت خارجہ کے محکمہ سرحدی اور سمندری امور کے ڈپٹی ڈائریکٹر جنرل وانگ جنفینگ نے دوطرفہ ڈائیلاگ کی مشترکہ صدارت کی۔
ترجمان دفتر خارجہ کی جانب سے جاری مشترکہ بیان کے مطابق سیشن کے دوران دوطرفہ بحری تعاون کے تمام شعبوں بشمول بحری تبادلوں، علاقائی تعاون، میری ٹائم انفراسٹرکچر کی ترقی، ماہی گیری، سائنس و ٹیکنالوجی، سرچ اینڈ ریسکیو مشنز، میری ٹائم ڈیزاسٹر مینجمنٹ اور سمندری آلودگی کی روک تھام پر تبادلہ خیال کیا گیا۔ فریقین نے دوطرفہ بحری تعاون کو مزید وسعت دینے کے عزم کا اظہار کرتے ہوئے دونوں ممالک کے درمیان ہر آزمائش پر پورا اترنے والی پاک چین دوستی اور اسٹریٹجک تعاون پر مبنی شراکت داری پر اطمینان کا اظہار کیا۔
دونوں فریقین نے ابھرتی ہوئی علاقائی اور عالمی بحری تبدیلیوں کا بھی جائزہ لیا اور اس بات پر اتفاق کیا کہ ان کا باہمی تعاون پرامن اور خوشحال ایشیا پیسیفک خطے کے لیے ان کے مشترکہ وژن کے مطابق ہے۔ ابھرتے ہوئے خطرات اور چیلنجوں کا مشترکہ جواب دینے کے لیے عملی تعاون کو آگے بڑھانے کی ضرورت پر زور دیتے ہوئے، دونوں فریقین نے دو طرفہ تبادلوں کی رفتار کو برقرار رکھنے اور دونوں ممالک کی بحری افواج کے درمیان تعلقات کو فروغ دینے پر اتفاق کیا۔
اس موقع پر چینی وفد نے مہمان نوازی اور پرتپاک استقبال کرنے پر پاکستان کا شکریہ ادا کیا۔ اس بات پر اتفاق کیا گیا کہ میری ٹائم ڈائیلاگ کا پانچواں دور اگلے سال چین میں ہوگا۔ ڈپٹی ڈائریکٹر جنرل وانگ جنفینگ نے بعد ازاں وزارت خارجہ کے ایڈیشنل سیکرٹری (ایشیا پیسفک) عمران احمد صدیقی سے ملاقات کی۔
Short Link: https://urdu.app.com.pk/urdu/?p=415472
