پشاور۔ 28 جون (اے پی پی):پشاور کی تھانہ پہاڑی پورہ پولیس نے ناکہ بندی کے دوران قتل ،اقدام قتل ، قبضہ گروپ سمیت دیگر سنگین مقدمات میں ملوث 4 ملزمان کو گرفتارکرکے خود کار اسلحہ برآمد کرلیا۔ کیپٹل سٹی پولیس پشاورکے مطابق اے ایس پی فقیر آباد سرکل پشاور محمد علیم کی زیر نگرانی ایس ایچ او تھانہ پہاڑی پورہ عاقب خان اوران کی ٹیم نےدوران ناکہ بندی مشکوک گاڑی میں سوار مسلح افراد کو رکنے کا اشارہ کیا جنہوں نے دوران چیکنگ پولیس کے ساتھ بدتمیزی کی اور دھمکیاں دیں،
پولیس نے کارروائی کے دوران ایک عدد کلاشنکوف ، ایک جی تھری رائفل اور متعدد کارتوس برآمد کر کے ملزمان نسم ، معاز ، جبران اور صدیق کو گرفتار کر لیا۔گرفتار ملزمان شہرکے مختلف تھانوں بڈھ بیر،خزانہ کو متعدد مقدمات میں مطلوب تھے۔کارروائی کے دوران بلٹ پروف گاڑی بھی قبضہ میں لے لی گئی ۔ابتدائی معلومات کے مطابق بلٹ پروف گاڑی کی این او سی بھی نہیں ہے .پولیس نےملزمان سے تفتیش شروع کردی ہے۔
