پشاور، چارسدہ اور صوابی میں اسلامیہ کالج کی ملکیتی اراضی کو قبضہ گروپوں سے واگزار کرکے کمرشل سرگرمیوں کے لیے استعمال میں لانے کا فیصلہ

پشاور۔ 07 مارچ (اے پی پی):تاریخی اسلامیہ کالج کے معاشی مسائل کے خاتمے اور ادارے کو خودمختار بنانے کے لئے تاریخی اسلامیہ کالج کی چارسدہ میں 55 کنال قیمتی اراضی کو واگزار کرکے کمرشل سرگرمیوں کےلیے استعمال کرنے کے بعد اسلامیہ کالج کے معاشی مسائل کے خاتمے اور خودمختار ادارہ بنانے کے لیے پشاور، چارسدہ اور صوابی میں کالج کی ملکیتی اراضی کو قبضہ گروپوں سے واگزار کرکے کمرشل سرگرمیوں کے لیے استعمال میں لانے کا فیصلہ کیا گیا ہے۔ اس حوالے سے کمشنر پشاور ڈویژن ریاض خان محسود کی زیر صدارت اجلاس میں ضلعی انتظامیہ پشاور، ضلعی انتظامیہ چارسدہ، ضلعی انتظامیہ صوابی، جامعہ پشاور انتظامیہ، کالج انتظامیہ، پشاور پولیس اور محکمہ مال کے افسران شریک ہوئے۔ اجلاس میں کمشنر پشاور ڈویژن ریاض خان محسود کو صوبائی دارالحکومت پشاور، چارسدہ، اور صوابی میں تاریخی اسلامیہ کالج کی اراضی جو کہ اونے پونے دام کرایہ پر دی گئی ہے، کے حوالے سے تفصیلی آگاہی دی گئی.

اجلاس میں فیصلہ کیا گیا کہ صوبائی دارالحکومت پشاور کے اہم تجارتی مرکز خیبر بازار میں اسلامیہ کالج کی 14 کنال اراضی جن پر 222 دوکانیں اور دفاتر تعمیر کی گئی ہے جو کہ اس وقت خستہ حالی کا شکار ہیں، اور خطرناک قرار دی گئی ہے دوکانوں اور دفاتر کو خالی کر وا کر کمرشل ٹاور بنایا جائے گا جس سے کالج کو معقول آمدنی حاصل ہوگی۔ اس کے علاوہ چارسدہ تنگی اور ترناب میں کالج کی 4500 جریب قیمتی اراضی جو کہ اونے پونے دام چار ہزار روپے سالانہ اجارہ پر دی گئی ہے کو واگزار کرکے موجودہ مارکیٹ ریٹ 65 ہزار روپے سالانہ اجارہ پر دی جائے گی جس سے کالج کی آمدن 2 کروڑ روپے سالانہ سے بڑھ کر 29 کروڑ روپے سالانہ تک پہنچ جائے گی۔ اسی طرح صوابی کے علاقے ہنڈ میں کالج کی 4 ہزار قیمتی اراضی کو بھی قبضہ گروپ سے واگزار کروا کر موجودہ مارکیٹ ریٹ پر کرایہ پر دی جائے گی۔

اس کے علاوہ صوبائی دارالحکومت پشاور کے یونیورسٹی روڈ پر 28 کنال کی قیمتی اراضی جو برج ہری سنگھ نلوہ کے نام سے مشہور ہے اور سابقہ سکھ گورنر ہری سنگھ بطور رہائش گاہ اور گورنر ہاؤس کے طور پر استعمال کرتے تھے رہائش گاہ کے فرنٹ سائڈ کو قبضہ گروپ سے واگزار کرکے پشاور اپ لفٹ پروگرام کے تحت اس کی تزئین و آرائش کرکے تاریخی حیثیت اور عظمت رفتہ بحال کی جائے گی اور حاصل ہونے والی آمدنی کالج کو دی جائے گی۔ اس حوالے سے کمشنر پشاور ڈویژن ریاض خان محسود نے ضلعی انتظامیہ پشاور، ضلعی انتظامیہ صوابی اور ضلعی انتظامیہ چارسدہ کو ابتدائی ہوم ورک مکمل کرکے پیر کے روز پیش کرنے کی ہدایات جاری کرتے ہوئے دوبارہ اجلاس طلب کرلیا۔اجلاس سے خطاب کرتے ہوئے کمشنر پشاور ڈویژن ریاض خان محسود نے کہا کہ تمام سرکاری اراضی جو کہ کسی بھی مقام پر ہو کو قبضہ گروپوں سے واگزار کرکے اداروں کی سپرد کی جائے گی تاکہ خودمختار اداروں کے معاشی مسائل حل کیا جاسکے۔

Short Link: https://urdu.app.com.pk/urdu/?p=570164