فیصل آباد۔ 27 مارچ (اے پی پی):پشاور اور لاہور بلوز نیشنل ٹی ٹوئنٹی کپ کے فائنل میں پہنچ گئے، آخری معرکہ میں آج (جمعرات کو)مد مقابل ہوں گے۔ تفصیلات کے مطابق سیمی فائنلز مقابلوں لاہور بلیوز نے ملتان اور پشاور نے ایبٹ آباد کو شکست دیکر فائنل میچ کیلئے کوالیفائی کرلیا ہے۔لاہور بلوز نے سیمی فائنل میں ملتان کو 5 رنز سے ہرادیا جبکہ صاحبزادہ فرحان کی 148 رنز کی جارحانہ اننگز کی بدولت پشاور نے نیشنل ٹی ٹوئنٹی کپ کے سیمی فائنل میں ایبٹ آباد کو 56 رنز سے شکست دے دی۔
اقبال سٹیڈیم فیصل آباد میں کھیلے گئے دوسرے سیمی فائنل میں لاہور بلوز نے ملتان کے خلاف ٹاس جیت کر پہلے بیٹنگ کرتے ہوئے 4 وکٹوں پر 166 رنز بنائے۔عمران بٹ نے11 چوکوں اور 2 چھکوں کی مدد سے89 رنز بنائے اور آؤٹ نہیں ہوئے۔ ملتان کی ٹیم جواب میں 20 اووز میں 7 وکٹوں پر 161رنز بنانے میں کامیاب ہوسکی۔زین عباس45 ۔ وسیم اکرم جونیئر 42 ناٹ آؤٹ اور محمد شہزاد 41 رنز کے ساتھ نمایاں رہے۔
نثار احمد اورمحمد رضوان نے دو دو وکٹیں حاصل کیں۔عمران بٹ نے پلیئر آف دی میچ ایوارڈ حاصل کیا۔ قبل ازیں پہلے سیمی فائنل میں ایبٹ آباد نے ٹاس جیت کر پشاور کو بیٹنگ دی جس نے 20 اوورز میں3 وکٹوں پر243 رنز بنائے۔صاحبزادہ فرحان نے صرف 72 گیندوں پر148 رنز کی شاندار اننگز کھیلی جس میں 10چوکے اور 12 چھکے شامل تھے۔ یہ اس ٹورنامنٹ میں ان کی تیسری سنچری ہے۔
انہوں نے وقار احمد کے ساتھ پہلی وکٹ کی شراکت میں116 رنز کا اضافہ کیا۔ وقار احمد نے34 اور معاذ صداقت نے31 رنز بنائے۔ایبٹ آباد کی ٹیم جواب میں 20 اوورز میں8 وکٹوں پر 187 رنز بناسکی۔شاہ زیب خان 53 رنز کے ساتھ ٹاپ اسکورر رہے۔عمران جونیئر ۔طارق عثمان ۔اسرار اللہ اور افتخار احمد نے دو دو وکٹیں حاصل کیں۔صاحبزادہ فرحان پلیئر آف دی میچ قرار پائے۔ پشاور اور لاہور بلوز نیشنل ٹی ٹوئنٹی کپ کے آخری معرکہ میں آج بروز جمعرات رات 11 بجے مد مقابل ہوں گے۔
Short Link: https://urdu.app.com.pk/urdu/?p=576579
