لاہور۔9مئی (اے پی پی):پنجاب بھرمیں 1111ٹریفک حادثات میں 15افراد جاں بحق1286زخمی ہوئے۔ترجمان کے مطابق ایمرجنسی سروسزڈیپارٹمنٹ نے گز شتہ 24گھنٹوں کے دوران پنجاب بھر میں 1111ٹریفک حادثات پر ریسپانڈ کیا جن میں 15افراد جان کی بازی ہار گئے،رحیم یار خان میں بس اور ٹریلر کے تصادم کے نتیجے میں 08 افراد جاں بحق ہوئے، حادثہ ڈرائیور کو نیند آنے کے باعث پیش آیا،
ڈی جی خان میں مختلف حادثات میں 3 افراد جاں بحق ہوئے،راولپنڈی، گوجرانوالہ، سرگودھا،بہاولنگر، گجرات،چکوال اور حافظ آباد میں ٹریفک حادثات کے نتیجے میں ایک، ایک شخص جاں بحق ہوا۔پنجاب بھر میں ٹریفک حادثات میں 509افراد شدید زخمی ہوئے جنہیں فوری طور پر نزدیکی ضلعی و تحصیل کے ہسپتالوں میں منتقل کیا گیا۔
777معمولی زخمی لوگوں کو ریسکیومیڈیکل ٹیموں کے جائے حادثہ پر بروقت طبی امداد فراہم کرنے کی وجہ سے ہسپتالوں پر بوجھ بھی کم ہوا۔ان حادثات میں زیادہ تر تعداد (75فیصد)موٹر سائیکلز حادثات کی ہے اس لیے وقت کی ضرورت ہے کہ روڈ ٹریفک حادثات کی بڑھتی ہوئی شرح کو کم کرنے کے لیے ٹریفک قوانین پر سختی سے عمل کرتے ہوئے لائن اور لین کے نظم و ضبط کا خیال رکھیں۔
Short Link: https://urdu.app.com.pk/urdu/?p=594980
