پنجاب بھر میں ایک ہفتہ کے لئےدفعہ 144 کا نفاذ

لاہور۔21جون (اے پی پی):محکمہ داخلہ نے پنجاب بھر میں دفعہ 144 کا فوری نفاذ کر دیا۔ اس سلسلہ میں نوٹیفکیشن جاری کر دیا گیا ہے۔ نوٹیفکیشن کے مطابق محکمہ داخلہ نے پنجاب بھر میں جلسہ جلوس، ریلیوں، دھرنوں اور احتجاج پر پابندی لگا دی ہے جبکہ صوبہ بھر میں 7 روز کیلئے دفعہ 144 نافذ کر دی گئی ہے۔

ترجمان محکمہ داخلہ کے مطابق امن و امان کے قیام، انسانی جانوں اور املاک کے تحفظ کیلئے دفعہ 144 نافذ کی گئی جبکہ پابندی کا اطلاق دہشت گردی کے خطرات کے پیشِ نظر کیا گیا۔ ترجمان کے مطابق خطرات کے پیش نظر عوامی ہجوم دہشت گردوں کیلئے سافٹ ٹارگٹ ہو سکتا ہے۔عوامی مفاد میں دفعہ 144 کا نفاذ صوبہ بھر میں جمعرات 27 جون تک کیا گیا ہے اور پنجاب بھر میں انتظامیہ حکم نامے پر عملدرآمد یقینی بنائے گی۔