لاہور۔28فروری (اے پی پی):حکومت پنجاب نے صوبے کی 43 جیلوں کو سولر انرجی پر منتقل کرنے کا فیصلہ کرلیا ، محکمہ داخلہ نے جیلوں کی سولر انرجی پر منتقلی کا مکمل پلان سروے رپورٹ کے ہمراہ وزیراعلیٰ کو منظوری کےلئے پیش کر دیا ہے۔ ترجمان نے بتایا کہ محکمہ داخلہ نے نیشنل ریڈیو اینڈ ٹیلی کمیونیکیشن کارپوریشن ( این آر ٹی سی) کی مدد سے تمام جیلوں کا ابتدائی سروے مکمل کیا جس میں جیلوں کی شمسی توانائی پر منتقلی کےلئے لاگت کا تخمینہ بھی لگایا گیا۔
انہوں نے کہا کہ صوبے کی 43 جیلوں میں بجلی اور گیس کا سالانہ بل ساڑھے 4 ارب تک پہنچ چکا ہے جبکہ تمام 43 جیلوں کی مکمل طور پر شمسی توانائی پر منتقلی کی کل لاگت ایک سال کے بلوں سے بھی کم ہے۔ نیشنل ریڈیو اینڈ ٹیلی کمیونیکیشن کارپوریشن کے مطابق پنجاب کی تمام جیلوں کو 4 ارب 35 کروڑ کی لاگت سے شمسی توانائی پر منتقل کیا جاسکتا ہے۔ انہوں نے بتایا کہ گرین انرجی کے مجوزہ حل پر مرحلہ وار عملدرآمد سے بجلی کے بلوں میں 60 فیصد کمی آئے گی، شمسی توانائی پر منتقلی سے 3 سالوں میں تمام سرمایہ کاری کی واپسی کے ساتھ طویل مدتی مالی ریلیف بھی ملے گا۔
ان کا کہنا تھا کہ شمسی توانائی پر منتقلی سے پنجاب کی جیلیں توانائی میں خود کفیل ہوں گی اور خزانے پر بوجھ کم ہوگا۔ ترجمان نے کہا کہ گزشتہ سالوں میں بجلی اور گیس کے بلوں میں ریکارڈ اضافے کے باعث گرین انرجی پر منتقلی کا فیصلہ کیاگیا۔ انہوں نے کہا کہ محکمہ داخلہ نے پنجاب کی تمام جیلوں کو شمسی توانائی پر منتقلی کا پلان صوبائی کابینہ کو پیش کرنے کی درخواست کر دی اور منصوبے کےلئے جاری مالی سال کے دوران 2 ارب روپے مختص کرنے کی سفارش کی گئی ہے۔
Short Link: https://urdu.app.com.pk/urdu/?p=567239
