پنجاب حکومت امن،رواداری اور ہم آہنگی کے فروغ کیلئے بھرپور اقدامات کر رہی ہے،مریم نواز

لاہور۔12فروری (اے پی پی):وزیر اعلی پنجاب مریم نواز شریف نے کہا ہے کہ پنجاب حکومت امن، رواداری اور ہم آہنگی کے فروغ کیلئے بھرپور اقدامات کر رہی ہے،برداشت، محبت اور یکجہتی پر مبنی معاشرہ تشکیل دینا اولین ترجیح ہے ۔بدھ کوانسداد تشددکے عالمی دن کی مناسبت سے اپنے ایک پیغام میں انہوں نے کہا کہ پاکستان نے انتہا پسندی اور دہشت گردی کیخلاف بے شمار قربانیاں دی ہیں،ہر قسم کے تشدد،انتہا پسندانہ رویوں اور دہشتگردی کی شدید مذمت کرتے ہیں،ہر سطح پر انتہا پسندی اور عدم برداشت کی حوصلہ شکنی کریں گے۔

مریم نواز نے کہا کہ پنجاب حکومت امن، رواداری اور ہم آہنگی کے فروغ کے لیے بھرپور اقدامات کر رہی ہے،سر زمین پاک پر کسی بھی شدت پسندانہ سوچ کو پنپنے کہ اجازت نہیں دیں گے،انتہا پسندانہ نظریات اور دہشت گردی کے خلاف متحد ہو کر جدوجہد جاری رکھیں گے۔انہوں نے کہا کہ حکومت پنجاب کی پالیسیوں کا بنیادی مقصد ایسا معاشرہ تشکیل دینا ہے جو برداشت، محبت اور یکجہتی پر قائم ہو،نوجوانوں کو انتہا پسندی کے بجائے علم،ترقی اور مثبت سوچ کی راہ پر گامزن کر رہے ہیں،ایک ایسا محفوظ، ترقی یافتہ اور پر امن پنجاب بنائیں گے جو دنیا کے لیے برداشت اور امن کی مثال بنے گا۔

Short Link: https://urdu.app.com.pk/urdu/?p=559696