لاہور۔21ستمبر (اے پی پی):وزیر اعلی پنجاب محسن نقوی کی ہدایت پر پنجاب حکومت کےوفد کا ننشیا یونیورسٹی کے سکول آف ایگریکلچر کا دورہ ، وفد نے آبپاشی و زرعی نظام کا جائزہ لیا۔صوبائی وزرا نے سکول آف ایگری کلچر میں زرعی ریسرچ سنٹر کے مختلف شعبوں کا مشاہدہ کیا اور جدید بنیادوں پر ریسرچ کاعمل دیکھا۔صوبائی وزرا ایس ایم تنویر، اظفر علی ناصر اور ابراہیم حسن مراد نے چینی طلبا و طالبات سے ملاقات اور تبادلہ خیال کیا۔
ایس ایم تنویر نے کہاکہ سکول آف ایگریکلچر ننشیا یونیورسٹی زرعی ریسرچ میں بہت آگے ہے، چینی زرعی ریسرچ سے استفادہ کریں گے۔اظفر علی ناصر نے سکول آف ایگری کلچر کو سراہتے ہوئے کہاکہ چینی طلبا و طالبات کیلئے سکول آف ایگریکلچر میں بہترین سہولتیں فراہم کی گئی ہیں۔ پنجاب کے زرعی ریسرچ اداروں کو بھی ننشیا یونیورسٹی کی طرز پر اپ گریڈ کرنے کی ضرورت ہے۔
ابراہیم حسن مراد نے کہاکہ زرعی ریسرچ میں چینی اداروں کی معاونت کا خیرمقدم کریں گے۔ دورے کا مقصد زرعی ریسرچ میں باہمی تعاون کو فروغ دینا ہے۔ اس موقع پر صوبائی وزرا کو بریفنگ میں بتایا گیاکہ ننشیا یونیورسٹی کے سکول آف ایگریکلچر کی فیکلٹی 200 ٹیچرز پر مشتمل ہے۔ سکول آف ایگریکلچر میں 2000 سے زائد سٹوڈنٹس زیر تعلیم ہیں۔
بعد ازاں صوبائی وزرا ایس ایم تنویر، اظفر علی ناصر،ابراہیم حسن مراد اور سیکرٹری خزانہ مجاہد شیر دل نے پنگ جی پا (Ping ji Pu)کے علاقے میں آبپاشی و زرعی سسٹم کامعائنہ کیا۔صوبائی وزرا نے ڈرپ ایریگیشن نظام کا مشاہدہ کیا اور مکئی کی تیار فصل کا مشاہدہ کیا
