پنجاب حکومت کے پروگرام ’’اب گاؤں چمکیں گے ‘‘ پر تیزی سے کام جاری ہے ، ڈپٹی کمشنر جہلم

جہلم 18 ستمبر (اے پی پی):ڈپٹی کمشنر جہلم کیپٹن(ر) سمیع اللہ فاروق نے کہا ہے کہ پنجاب حکومت کے پروگرام ’’اب گاؤں چمکیں گے ‘‘ پر تیزی سے کام جاری ہے ، بہت جلد ضلع بھر میں اس کے اثرات نظر آئیں گے ۔ ان خیالات کا اظہار انہوں نے حکومت پنجاب کے انقلابی پروگرام اب گاؤں چمکیں گے ، کے حوالے سے جائزہ اجلاس کی صدارت کرتے ہوئے کیا۔

انہوں نے کہا کہ تمام یونین کونسل سیکرٹری اس پروگرام کو موثر طور پر عمل درآمد کروانے کے ذمہ دار ہیں ، تمام دیہاتوں میں اہل علاقہ کے تعاون سے اس پروگرام کو ہنگامی بنیادوں پر فعال رکھا جائے تاکہ شہروں کے ساتھ ساتھ دیہاتی علاقوں میں بھی صاف و شفاف ماحول فراہم کیا جا سکے۔ اس موقع پر ڈپٹی کمشنر کو اب گاؤں چمکیں گے پروگرام کے تحت اب تک کی کارکردگی پر بریفنگ دی گئی۔