اسلام آباد۔23جون (اے پی پی):کارپٹ ٹریننگ انسٹی ٹیوٹ کے چیئر پرسن اعجاز الرحمان نے کہا ہے کہ بعض مسائل کی وجہ سے پاکستان کے ہاتھ سے بنے قالینوں کی برآمدات 2007سے گراوٹ کا شکار ہیں جبکہ اس کے برعکس چین ،ترکی اوربھارت نے برآمدات میں نمایاں کارکردگی کا مظاہرہ کیا ہے،ہاتھ سے بنے قالینوں کی صنعت کی سرگرمیوں میں پنجاب کا کلیدی کردار تھا جو اب سکڑ رہا ہے اس لئے اسٹیک ہولڈرز اس کے عوامل پر خصوصی توجہ مرکوز کریں ۔
ان خیالات کا اظہار انہوں نے ہاتھ سے بنے قالینوں کے مینو فیکچررز اور برآمد کنندگان کے وفد سے ملاقات میں گفتگو کرتے ہوئے کیا ۔ اعجاز الرحمان نے کہا کہ مشاہدے میں آیا ہے کہ ہنر مند وں کو درپیش مالی اور بنیادی ڈھانچے کے مسائل نے پاکستان میں ہاتھ سے بنے قالین کی صنعت کی ترقی اور فروغ میں رکاوٹ ڈالی ہے۔اس صنعت سے زیادہ تر خواتین وابستہ ہیں تاہم ان کے لئے کام کے اوقات زیادہ ہونے کے ساتھ انہیں غیر موافق حالات کا بھی سامنا ہے ،نا خواندگی اور خاندان کے افراد کی تعداد زیادہ ہونااور کم اجرت بھی ایک بڑی وجہ ہے جسے بہتر کرنے کی ضرورت ہے ۔
انہوں نے کہا کہ افغان مہاجرین کی اپنے ملک میں دوبارہ آباد کاری اور ہنر مند افرادی قوت کی کمی بھی اس صنعت کے فروغ میں بڑی رکاوٹ ہے ۔ اعجاز الرحمان نے کہا کہ عالمی منڈیوں میں سخت مقابلے کا رجحان ہے جس کیلئے ہمیں سخت ضوابط اور معیار کے ساتھ تیاری کرنا ہو گی ،ہمیں حریف ممالک کا مقابلہ کرنے کیلئے نئی مہارت کو متعارف کرانا ہوگا لیکن بد قسمتی سے اس کے لئے اس استعداد کے تکنیکی ادارے موجود نہیں ۔
ہم نئی عالمی منڈیوں تک رسائی حاصل کرنے میں بھی اس طرح کامیابی حاصل نہیں کر سکے جس کی ضرورت ہے ۔ہماری صنعت کو اس وقت سب سے بڑا مسئلہ متعلقہ ہنر مندوں کی کمی ہے جس پر توجہ مرکوز نہ کی گئی تو مسائل گھمبیر ہو جائیں گے۔ انہوں نے کہا کہ تمام اسٹیک ہولڈرز خصوصاپنجاب کے متعلقہ محکموں کو ہاتھ سے بنے قالینوں کی صنعت کی بقا کے لئے اپنا فعال کردار اور ادارہ جاتی معاونت فراہم کرنا ہو گی ۔
Short Link: https://urdu.app.com.pk/urdu/?p=478194
