ملتان ۔ 07 اکتوبر (اے پی پی):نگران صوبائی وزیر صنعت وتجارت اور زراعت پنجاب ایس ایم تنویر نے کہا ہے کہ پنجاب میں زراعت کے فروغ کیلئے 10 سالہ پلان ترتیب دیا جا رہا ،جو آئندہ دو ماہ میں سب کے سامنے رکھا جائے گا۔یہ بات انہوں نے ہفتے کو یہاں کاٹن ریسرچ انسٹیٹیوٹ ملتان میں عالمی یوم کپاس کے حوالے سے پاکستان کاٹن جینرز ایسوسی ایشن کے زیر اہتمام منعقدہ تقریب میں نگران وزیراعلیٰ پنجاب محسن نقوی کی نمائندگی کرتے ہوئے اپنے خطاب میں کہی۔ایس ایم تنویر نے کہا کہ کپاس کی کاشت اور پیداوار بڑھانے کے لئے وزیراعلیٰ پنجاب محسن نقوی نے بڑی محنت کی ہے،رواں سال 10 ملین سے زائد کپاس کی گانٹھیں حاصل ہوں گی۔
انہوں نے کہا کہ کپاس کا عالمی دن منانے کامقصد کپاس کی اہمیت کو نہ صرف پاکستان بلکہ عالمی سطح پر اجاگر کرنا ہے، آئندہ دو ماہ میں پنجاب میں زراعت کے فروغ کیلئے 10 سالہ پلان دے دیں گے۔نگران صوبائی وزیر نے کہا کہ پانی کے ضیاع کو روکنے کے لئے اہم اقدامات کرنے ہیں، گریٹر تھل کنال منصوبہ مکمل کیا جائے گا،پوٹھوہار ریجن میں 58 سمال ڈیمز فعال کریں گے۔
ا نہوں نے کہا کہ کپاس کی پیداوار میں جدید ٹیکنالوجی کو بروئے کار لا کر اضافہ کرنا ہے،کپاس پیدا کرنے والے ممالک میں باہمی سائنسی و تجارتی روابطہ کو بڑھانا ہے،کپاس کی انڈسٹری کو جدید تحقیق کے مطابق استوار کرنا ہے۔انہوں نے مزید کہا کہ جنوبی پنجاب کپاس کی پیداوار کے حوالے سے ایک منفرد حیثیت رکھتا ہے، کسانوں کو اعلی کوالٹی کے بیچ و زرعی زہروں کی فراہمی کو یقینی بنایا جا رہا ہے،
معیشت کی بنیاد زراعت اور زراعت کی بنیاد کپاس پر ہے،رواں سال اپریل میں کپاس کی بحالی کے لئے شروع کئے گئے سفر کے اچھے نتائج برآمد ہوئے ہیں، اس سال کپاس کے زیر کاشت رقبہ میں 50 فیصد اضافہ ہوا، کپاس کی اس سال دوگنی پیداوار حاصل ہوگی۔
تقریب میں سابق وزیراعظم سید یوسف رضا گیلانی، سابق وفاقی وزراء سید خورشید شاہ، عبدالرحمن کانجو، ایڈیشنل چیف سیکرٹری جنوبی پنجاب کیپٹن ریٹائرڈ ثاقب ظفر ،سیکرٹری زراعت پنجاب افتخار علی سہو، سیکرٹری زراعت جنوبی پنجاب ثاقب علی عطیل،وائس چانسلر ایم این ایس زرعی یونیورسٹی راؤ آصف علی، چئیرمین پاکستان کاٹن جینرز ایسوسی ایشن وحید ارشد، زرعی ماہرین، کاشتکاروں، صنعت کاروں اور غیر ملکی مندوبین نے شرکت کی۔
Short Link: https://urdu.app.com.pk/urdu/?p=398460
