فیصل آباد ۔ 18 دسمبر (اے پی پی):فیصل آباد ڈویژن کے چاروں اضلاع فیصل آباد، جھنگ، ٹوبہ ٹیک سنگھ، چنیوٹ سمیت پنجاب بھرمیں جانوروں کی تعدا د8کروڑ93لاکھ سے تجاوزکرگئی ہے جبکہ مذکورہ جانوروں و مویشیوں کی بڑھتی ہوئی غذائی ضروریات کو پورا کرنے کیلئے 60لاکھ ایکڑ سے زائد رقبہ پر سبز چارہ کاشت کیا جائے گا۔
نظامت زرعی اطلاعات محکمہ زراعت کے ترجمان نے بتایاکہ پنجا ب میں عام طورپر جانوروں کیلئے سبز چارے کی قلت پائی جاتی ہے اور ایک جانور کے حصہ میں 25من چارہ سالانہ میسر آتا ہے نیزمئی جون کے مہنیوں میں سبز چارے کی قلت زیادہ نوٹ کی گئی ہے اوراس کمی کو دور کرنے کیلئے حکومت نے سبزچاروں کی پیداوار میں اضافہ کیلئے نئے منصوبے شروع کئے ہیں۔انہوں نے بتایاکہ ان منصوبوں میں کاشتکاروں کو خریف چاروں جوار، باجرہ، سدا بہار چارہ،گوارہ، رواں، ماٹ گراس، کلر گھاس، جنتر اور موسمی مکئی کی نئی اقسام کے خالص بیجوں کی فراہمی میں معاونت کی جا ئے گی۔
انہوں نے بتایا کہ غذائی اور نقد آور فصلوں کی اہمیت کے پیش نظر چاروں کی پیداوار میں اضافہ کیلئے ہم رقبہ میں اضافہ نہیں کرسکتے مگر اس بات کی اشد ضرورت ہے کہ ہم ایسی منصوبہ بندی کریں جس سے چارہ جات کی فی ایکڑ پیداوار میں خاطر خواہ اضافہ ہوسکے۔ انہوں نے زرعی توسیعی افسران کو ہدایت کی کہ وہ کاشتکاروں اور مویشی پال حضرات کو غذائیت سے بھر پور چاروں کی فی ایکڑبہترین پیداوار کے حصول کیلئے خصوصی آگاہی مہم شروع کریں۔
Short Link: https://urdu.app.com.pk/urdu/?p=537227
