پنجاب پولیس تھانوں، چیک پوسٹوں اور دفاتر کو سولر سسٹم پر منتقل کرنے کا عمل تیزی سے جاری

لاہور۔28مارچ (اے پی پی):پنجاب پولیس کے تمام تھانوں، چیک پوسٹوں اور دفاتر کو سولر سسٹم پر منتقل کرنے کا عمل تیزی سے جاری ہے۔ ترجمان پنجاب پولیس کے مطابق اب تک 369 پولیس سٹیشنز اور 3 پی ایچ پی چیک پوسٹوں کو سولر سسٹم پر منتقل کیا جا چکا ہے جن میں گوجرانوالہ ریجن کے 80، سرگودھا 49، لاہور 45، بہاولپور 41، راولپنڈی کے 40 تھانے سولر انرجی سسٹم پر منتقل کئے جا چکے ہیں جبکہ ڈی جی خان کے 32، ساہیوال 30، فیصل آباد 26، شیخوپورہ کے 26 تھانے سولر سسٹم پر منتقل کئے گئے ہیں۔

اسی طرح کچہ ایریا کی تمام پولیس چوکیوں اور کیمپس کو بھی سولر سسٹم پر منتقل کیا جا چکاہے۔ انہوں نے کہاکہ پنجاب پولیس کے دیگر تمام پولیس تھانوں، چوکیوں کو بتدریج سولر سسٹم پر منتقل کرنے کا پلان تشکیل دے دیاگیاہے۔ آئی جی پنجاب ڈاکٹر عثمان انورکا کہنا ہیکہ پنجاب پولیس کے تمام دفاتر، تھانوں اور چوکیوں کو اسی سال سولر سسٹم پر منتقل کر دیا جائے گا جس سے سولر سسٹم پر منتقلی سے پنجاب پولیس کو ماہانہ کروڑوں روپے الیکٹرسٹی بلوں کی مد میں بچت ہو گی۔

Short Link: https://urdu.app.com.pk/urdu/?p=576913