لاہور۔23مئی (اے پی پی):انسپکٹر جنرل پولیس ڈاکٹر عثمان انور کی ہدایت پر صوبہ بھر میں پنجاب پولیس نے عید الاضحیٰ کی آمد کے پیش نظر مویشی منڈیوں کے سکیورٹی انتظامات مکمل کر لئے ہیں۔ترجمان پنجاب پولیس نے بتایا کہ لاہور سمیت صوبہ بھر کی230 مویشی منڈیوں کی سکیورٹی فرائض4000 افسران و اہلکار سر انجام دے رہے ہیں، لاہور میں 11 مویشی منڈیوں کی سکیورٹی پر 1000 پولیس افسران اور جوان تعینات کیے گئے ہیں۔اس حوالے سے آئی جی پنجاب کا کہنا تھا کہ مویشی منڈیوں میں بیوپاریوں اور خریدار شہریوں کی سکیورٹی کیلئے جامع اقدامات کئے گئے ہیں،ضلعی انتظامیہ کے منظور کردہ پوائنٹس کے علاوہ کسی بھی جگہ مویشی منڈی لگانے کی اجازت نہیں، غیر قانونی مویشی منڈیوں اور سیل پوائنٹس کے خلاف قانونی کارروائی عمل میں لائیں، نوسر بازوں، جیب تراشوں اور جرائم پیشہ افراد کی سرکوبی کیلئے موثر پٹرولنگ پلان تشکیل دیا جائے
ڈولفن سکواڈ اور پولیس رسپانس یونٹ سمیت 284 پٹرولنگ ٹیمیں مویشی منڈیوں کے اطراف موثر پٹرولنگ کریں گی۔ترجمان نے مزیدبتایا کہ شیخوپورہ ریجن میں 26 مویشی منڈیوں کی سکیورٹی پر 200 افسران و اہلکار تعینات اور گوجرانوالہ ریجن میں 41 مویشی منڈیوں کی سکیورٹی کیلئے 600 افسران و اہلکار تعینات کیے گئے ہیں۔اسی طرح راولپنڈی ریجن میں 15 مویشی منڈیوں کی سکیورٹی کیلئے 250 سے زائد افسران و اہلکار تعینات ، سرگودھا ریجن میں 24 مویشی منڈیوں کی سکیورٹی کیلئے 200 افسران و اہلکار،فیصل آباد میں 19 مویشی منڈیوں کی سکیورٹی کیلئے 600 سے زائد افسران و اہلکار ،ملتان میں 26 مویشی منڈیوں کی سکیورٹی کیلئے 400 سے زائد افسران و اہلکار،ساہیوال میں 11 مویشی منڈیوں کی سکیورٹی کیلئے 200 سے زائد افسران و اہلکار ، بہاولپور میں 35 مویشی منڈیوں کی سکیورٹی کیلئے 300 سے زائد افسران و اہلکار اور ڈی جی خان میں 22 مویشی منڈیوں کی سکیورٹی کیلئے 200 سے زائد افسران و اہلکار تعینات کیے گئے ہیں۔
Short Link: https://urdu.app.com.pk/urdu/?p=600868
