لاہور۔19نومبر (اے پی پی):انسپکٹر جنرل آف پولیس ڈاکٹر عثمان انور کی ہدایت پر پنجاب پولیس سموگ کی روک تھام اور ماحولیاتی تحفظ کیلئے ان ایکشن ہے اور پنجاب پولیس کے بروقت اقدامات کی وجہ سے سموگ کی شدت میں کمی آئی ہے۔ آئی جی پنجاب نے کہا ہے کہ گزشتہ 24 گھنٹوں میں لاہور سمیت صوبہ بھر میں سموگ کریک ڈائون کے دوران 49مقدمات درج کرتے ہوئے26افراد کو گرفتار کیا گیا۔630افراد کو تقریبا ً15لاکھ 13ہزار روپے سے زائد جرمانے عائد کئے گئے جبکہ 143افراد کو وارننگ جاری کی گئی۔
انہوں نے بتایا کہ فصلوں کی باقیات جلانے کی 26، زیادہ دھواں چھوڑنے والی گاڑیوں کی 530، صنعتی سرگرمی کی 1، اینٹوں کے بھٹوں کی 19اور دیگر مقامات پر4خلاف ورزیاں رپورٹ ہوئیں۔ رواں برس انسداد سموگ کریک ڈائون میں مجموعی طور پر 2778ملزمان گرفتار ہوئے اور 3358مقدمات درج کئے گئے۔35659افراد کو مجموعی طور پر 9کروڑ 8لاکھ روپے سے زائد جرمانے کئے اور 6452افراد کو وارننگ جاری کی گئی۔
فصلوں کی باقیات جلانے کی 1834، زیادہ دھواں چھوڑنے والی گاڑیوں کی 28535، صنعتی سرگرمی کی 336، اینٹوں کے بھٹوں کی 1314اور دیگر مقامات کی 310خلاف ورزیاں رپورٹ ہوئیں۔انہوں نے بتایا کہ گزشتہ 24گھنٹوں میں زیادہ دھواں چھوڑنے والی 6259گاڑیوں کے چالان، 391کو بند جبکہ 8فٹنس سر ٹیفکیٹ معطل کئے گئے۔
رواں برس شاہرات پر زیادہ دھواں چھوڑنے والی 8لاکھ 6ہزار 233گاڑیوں کے چالان کئے گئے، 1لاکھ 65ہزار 714 گاڑیوں کو بند اور 10ہزار 43گاڑیوں کے فٹنس سر ٹیفکیٹ معطل کئے گئے۔
آئی جی پنجاب نے شاہراہوں، انڈسٹریل ایریاز، زرعی سمیت دیگر مقامات پر انسداد سموگ کریک ڈائون میں تیزی کا حکم دیتے ہوئے کہاکہ سموگ ایس او پیز کی خلاف ورزی پر ذمہ داران کے خلاف زیرو ٹالرینس کے تحت سخت کارروائی میں تاخیر نہ کی جائے۔
