لاہور۔6مارچ (اے پی پی):پنجاب کی18رکنی کابینہ نے حلف اٹھالیا، گورنر پنجاب نے حلف لیا،وزیر اعلی پنجاب مریم نواز شریف بھی اس موقع پر موجود تھیں۔ بدھ کے روز گورنر ہائوس لاہور میں صوبائی کابینہ کی حلف وفاداری کی تقریب منعقد ہوئی،جس میں گورنر پنجاب محمد بلیغ الرحمن نے حلف لیا۔
حلف لینے والے کابینہ کے ارکان میں سینئر وزیر مریم اورنگ زیب ،عظمی زاہد بخاری،سید عاشق شاہ،کاظم پیر زادہ ،رانا سکندر حیات،خواجہ سلمان رفیق،خواجہ عمران نذیر ،ذیشان رفیق،بلال اکبر خان،سہیل احمد خان ،بلال یاسین ،رمیش سنگھ اروڑہ ،خلیل طاہر سندھو،فیصل ایوب،شافع حسین،شیر علی گورچانی،سہیل شوکت اور مجتبی شجاع الرحمن شامل ہیں۔
وزیراعلی پنجاب مریم نوازشریف تقریب میں شرکت کیلئے گورنر ہائوس گئیں جہاں انہوں نے گورنر پنجاب محمد بلیغ الرحمن سے ملاقات کی اورصوبائی کابینہ کے ارکان کی تقریب حلف برداری میں شرکت کی۔
وزیراعلی مریم نوازشریف نے حلف اٹھانے والے وزرا کو مبارکباد دی اورنئی کابینہ کے ارکان کیلئے نیک تمنائوں کا اظہار کیا اور کہا کہ پنجاب کی نئی کابینہ سے عوام کو بہت توقعات ہیں،عوامی امیدوں پر پورا اتریں گے۔مریم نوازشریف نے کہا کہ میں اور میری ٹیم آج کے دن سے عوام کی خدمت کا عہد کرتے ہیں۔
