لاہور۔24اگست (اے پی پی):وزیر اعلی پنجاب کی ہدایات کے پیشِ نظر پی ڈی ایم اے پنجاب کی مون سون فلڈ کی صورتحال بارے فیکٹ شیٹ جاری کردی ،فیکٹ شیٹ میں مون سون بارشوں، دریائوں، ڈیمز اور سیلابی صورتحال بارے اعدادوشمار شامل ہیں ۔ترجمان کے مطابق صوبے بھر میں مون سون بارشوں کا آٹھواں اسپیل جاری ہے۔
گزشتہ 24 گھنٹوں کے دوران گجرات میں 126 ملی میٹر، گوجرانولہ 75، سیالکوٹ 70، مری 68، جہلم 62، بہاولنگر 38، حافظ آباد 36، راولپنڈی 33، بھکر31 اور چکوال میں31 ملی میٹر تک بارش ریکارڈ کی گئی۔ ترجمان کے مطابق صوبائی دارالحکومت لاہور، ڈیرہ غازی خان، منگلا، شیخوپورہ، سرگودھا، اٹک، فیصل آباد، میانوالی، ٹوبہ ٹیک سنگھ، شورکوٹ اور ساہیوال میں بھی بارشیں ریکارڈ کی گئی۔ آئندہ 24 گھنٹوں کے دوران پنجاب کے بیشتر اضلاع میں شدید مون سون بارشیں ہونگی۔ مون سون بارشوں کا آٹھواں اسپیل 27 اگست تک جاری رہے گا ۔
ترجمان کے مطابق بالائی پنجاب کے اضلاع مری، راولپنڈی، اٹک، جہلم اور چکوال میں طوفانی بارشوں کی پیشگوئی ہے۔ی جی پی ڈی ایم اے عرفان علی کاٹھیا نے ولنرایبل اضلاع کو ہائی الرٹ رہنے کی ہدایات جاری کر دی ہیں۔ انہوں نے کہا کہ دریائے سندھ میں تربیلا کے مقام پر نچلے درجے کی سیلابی صورتحال ہے۔
دریائے سندھ میں کالاباغ، چشمہ اور تونسہ کے مقام پر پانی کا بہائو نارمل سطح پر ہے۔ دریائے ستلج میں گنڈا سنگھ والا کے مقام پر اونچے درجے کی سیلابی صورتحال ہے۔ دریائے ستلج سلیمانکی کے مقام پر درمیانے درجے کا سیلاب ہے۔ دریائے چناب، جہلم اور راوی میں آئندہ 48 گھنٹوں میں پانی کے بہائو میں اضافے کا خدشہ ہے۔ ڈی جی پی ڈی ایم اے نے کہا کہ تربیلا ڈیم 100 فیصد جبکہ منگلا ڈیم 75 فیصد تک بھر چکاہے۔
بھارتی ڈیمز میں بھاکڑا 80، پونگ 87 اور تھین ڈیم 85 فیصد تک بھر چکا ہے۔ انہوں نے کہا کہ بارش کے دوران ریسکیو و ریلیف ادارے فیلڈ میں موجود رہیں۔ شہریوں سے اپیل ہے کہ موسم برسات میں احتیاطی تدابیر اختیار کریں۔بچوں کا خیال رکھیں انہیں برساتی نالوں نشیبی علاقوں دریائوں اور نہروں میں ہرگز مت نہانے دیں۔
ڈی جی عرفان علی کاٹھیا نے کہا کہ گزشتہ 24 گھنٹوں کے دوران پنجاب میں مون سون بارشوں کے باعث کوئی جانی و مالی نقصان رپورٹ نہیں ہوا ۔
