لاہور۔1ستمبر (اے پی پی):پی ڈی ایم اے پنجاب نے دریائے ستلج، راوی، چناب اور ملحقہ ندی نالوں میں انتہائی اونچے درجے کے سیلاب کا الرٹ جاری کردیا ۔ ترجمان کے مطابق 5 ستمبر تک دریائے راوی، ستلج اور چناب میں انتہائی اونچے درجے کے سیلاب کا خدشہ ہے جبکہ آئندہ 72 گھنٹوں میں صوبائی دارالحکومت لاہور، گجرانوالہ اور گجرات میں اربن فلڈنگ کا خدشہ ہے۔ترجمان کے مطابق دریائے ستلج میں گنڈا سنگھ والا کے مقام پر اونچے درجے کے سیلاب کی صورتحال برقرار رہے گی۔ 3ستمبر تک دریائوں کے بالائی حصوں میں شدید بارشوں کا امکان ہے۔
ترجمان کے مطابق دریائے چناب ہیڈ تریموں کے مقام پر اس وقت انتہائی اونچے درجے کا سیلاب ہے۔پی ڈی ایم اے کی جانب سے کمشنرز و ڈپٹی کمشنرز کو الرٹ جاری کردیا گیا ہے ۔ لاہور، ساہیوال، گجرانوالہ، سرگودھا، فیصل آباد ، بہاولپور، ملتان اور ڈیرہ غازی خان کے کمشنرز جبکہ سیالکوٹ، شیخوپورہ، لاہور، قصور، ننکانہ صاحب، اوکاڑہ، فیصل آباد، ساہیوال، ٹوبہ ٹیک سنگھ، گجرات، سیالکوٹ، وزیر آباد، گجرانوالہ، منڈی بہاوالدین، حافظ آباد، سرگودھا، چنیوٹ، خانیوال، کوٹ ادو ،جھنگ ،رحیم یار خان، راجن پور، پاکپتن، بہاولنگر، وہاڑی، لودھراں، لیہ، ملتان، بہاولپور، مظفر گڑھ اور راجن پور کے ڈپٹی کمشنرز کو بھی الرٹ جاری کردیا گیا ہے ۔
ریلیف کمشنر پنجاب نبیل جاوید نے کمشنرز، ڈپٹی کمشنرز اور دیگر حکام کو ممکنہ صورتحال بارے الرٹ رہنے کی ہدایات جاری کر دی ہیں۔ سیلابی صورتحال کے بارے لوکل گورنمنٹ، محکمہ زراعت، محکمہ آبپاشی، محکمہ صحت، محکمہ جنگلات، لائیو اسٹاک اور محکمہ ٹرانسپورٹ کو بھی الرٹ جاری کر دیا گیا ہے۔
ریلیف کمشنر پنجاب نبیل جاوید نے کہا ہے کہ وزیر اعلی پنجاب کی ہدایات کے پیش نظر تمام تر انتظامات مکمل ہیں۔ایمرجنسی کنٹرول رومز میں سٹاف الرٹ ہے۔ عوام جاری کردہ احتیاطی تدابیر پر عمل کریں۔ہنگامی انخلاء کی صورت میں انتظامیہ سے تعاون کریں ۔شہری ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں۔
