لاہور۔29اپریل (اے پی پی):پنجاب یونیورسٹی انسٹیٹیوٹ آف کیمیکل انجینئرنگ اینڈ ٹیکنالوجی کے زیر اہتمام پیکجز گروپ آف انڈسٹری کی جانب سے پہلا آن کیمپس ریکروٹمنٹ ڈرائیو کیا گیا۔پیکجز گروپ پاکستان کی صف اول کی صنعت ہے جو کہ پیکیجنگ، اشیائے صرف اور خوردہ شعبوں میں نمایاں مقام رکھتی ہے۔ تقریب میں ڈائریکٹر انسٹیٹیوٹ آف کیمیکل انجینئرنگ اینڈ ٹیکنالوجی پروفیسر ڈاکٹر سید نادر حسین، فیکلٹی ممبران، پیکجز گروپ کے نمائندے، انسٹیٹیوٹ آف کیمیکل انجینئرنگ اینڈ ٹیکنالوجی، انسٹیٹیوٹ آف انرجی اینڈ انوائرمنٹ اورسکول آف کیمسٹری سے تقریبا 200طلباطالبات نے شرکت کی۔
کیرئیر کونسلنگ، پلیسمنٹ اور ایلومنائی سیل کے انچارج ڈاکٹر ایاز محمدنے پیکجز گروپ کی ٹیم خوش آمدید کہا۔ پیکجز گروپ کے نمائندوں نے جامع پریزنٹیشن پیش کرتے ہوئے کمپنی کی تاریخ، وسیع کاروباری آپریشنز، اختراع کی ثقافت اور پائیداری کو اجاگر کرتے ہوئے طلبا کو پیکجز ایسپائر مینجمنٹ ٹرینی پروگرام سے روشناس کرایا۔
انہوں نے انسٹیٹیوٹ آف کیمیکل انجینئرنگ اینڈ ٹیکنالوجی کی جانب سے طلبا کے لئے بہترین تقریب کا انعقاد کرنے پر تعریف کی۔ڈاکٹر نادر نے کیمپس کا دورہ کرنے اور طلبا کی عملی زندگی میں ترقی کیلئے معاونت فراہم کرنے کرنے پر پیکجز گروپ کا شکریہ ادا کیا۔ انہوں نے اکیڈیمیا اور صنعت کے مضبوط روابط کو فروغ دینے کی اہمیت پرروشنی ڈالی۔ انہوں نے تعاون کے فروغ، صنعتی تربیت کے مواقع اور آئی سی ای ٹی سمیت منسلک شعبہ جات کے طلبا کے لیے کیریئر کے مواقعوں پر زور دیا۔
Short Link: https://urdu.app.com.pk/urdu/?p=589679
