اسلام آباد۔21مارچ (اے پی پی):پٹرولیم مصنوعات کی برآمدات میں جاری مالی سال کے پہلے آٹھ ماہ میں95.33فیصد کا نمایاں اضافہ ہوا ہے، اس مدت کے دوران پٹرولیم مصنوعا ت کی درآمدات میں 1.22فیصد کا معمولی اضافہ ہوا ہے۔
ادارہ برائے شماریات پاکستان (پی بی ایس) کے اعدادوشمارکے مطابق جاری مالی سال میں جولائی تا فروری کے دوران پٹرولیم مصنوعات کی برآمدات کا حجم 358.15ملین ڈالر تک پہنچ گیا جبکہ گزشتہ مالی سال کی اسی مدت کے دوران پٹرولیم مصنوعات کی برآمدات سے 183.33ملین ڈالر زرمبادلہ کمایا گیا تھا۔
اس طرح گزشتہ مالی سال کے مقابلے میں رواں مالی سال کے ابتدائی آٹھ ماہ کے دوران پٹرولیم مصنوعات کی قومی برآمدات میں 174.82ملین ڈالریعنی 95فیصدسے زائد کا نمایاں اضافہ ریکارڈ کیا گیا ۔ اعدادوشمارکے مطابق دوسری جانب پٹرولیم مصنوعات کی درآمدات میں جاری مالی سال کے دوران 1.22فیصد کا معمولی اضافہ ہوا ہے اور درآمدات کا حجم گزشتہ مالی سال کی 10.58ارب ڈالرکے مقابلے میں 10.71ارب ڈالر ہوگیا۔
رپورٹ کے مطابق جولائی تافروری کے دوران خام تیل کی درآمدات میں 6.51فیصد تاہم پٹرولیم کروڈ کی درآمدات میں 20.29فیصد اضافہ جبکہ پٹرولیم مصنوعات کی درآمدات میں 3.87فیصد کی کمی واقع ہوئی ہے۔
Short Link: https://urdu.app.com.pk/urdu/?p=574980
