پیرس۔29جولائی (اے پی پی):پیرس اولمپکس گیمز میں مردوں کے فٹ بال ایونٹ میں کل(منگل کو)مزید 8 میچز کھیلے جائیں گے،یہ فٹ بال ایونٹ میں 8 آخری گروپ میچز ہوں گے جس کے بعد ناک آئوٹ لائن اپ مکمل ہوجائے گا۔پیرس اولمپکس گیمز میں شائقین کو انتہائی دلچسپ اور کانٹے دار مقابلے دیکھنے کو مل رہے ہیں۔
فٹ بال ایونٹ میں منگل کو کھیلے جانے والے پہلے میچ میں گروپ اے کی ٹیمیں میزبان فرانس اور نیوزی لینڈ آمنے سامنے ہوں گی ،گروپ اے کے دوسرے میچ میں امریکا اور گنی کی ٹیمیں پنجہ آزمائی کریں گی، تیسرے میچ میں گروپ بی کی ٹیمیں ارجنٹائن اور یوکرین نبرد آزما ہوں گی ،چوتھے میچ میں گروپ بی کی ٹیمیں مراکش اور عراق آمنے سامنے ہوں گی ، پانچواں میچ گروپ سی کی ٹیموں ڈومینیکن ریپبلک اور ازبکستان کے درمیان میچ کھیلا جائے گا ،چھٹے میچ میں گروپ سی کی ٹیمیں سپین اور مصر ،ساتویں میچ میں گروپ ڈی کی ٹیمیں اسرائیل اور جاپان جبکہ آٹھویں میچ میں گروپ ڈی کی ٹیمیں پیراگوئے اور مالی آمنے سامنے ہوں گی۔
مردوں کے فٹ بال ایونٹ میں 16 ٹیموں کو چار گروپس میں تقسیم کیا گیا ہے ۔ گروپ اے میں فرانس،امریکا،گنی اور نیوزی لینڈ شامل ہیں۔ گروپ بی ارجنٹائن ،مراکش،عراق اور یوکرین شامل ہیں۔ گروپ سی میں ازبکستان،سپین،مصر اور ڈومینیکن ریپبلک شامل ہیں اسی طرح گروپ ڈی میں جاپان،پیراگوئے ،مالی اور اسرائیل شامل ہیں۔ مینز فٹ بال ایونٹ کے چاروں کوارٹر فائنلز 2 اگست کو کھیلے جائیں گے،سیمی فائنلز 5 اگست کو کھیلے جائیں گے ، تیسری پوزیشن کے لئے میچ 8 اگست کو جبکہ طلائی تمغے کے لئے میچ 9 اگست کو کھیلا جائے گا۔
