پیرس ۔5اگست (اے پی پی):پیرس اولمپکس گیمز میں مردوں کے فیلڈ ہاکی ایونٹ کا کوارٹر فائنل رائونڈ ختم ہونے کے بعد سیمی فائنل لائن اپ مکمل ہوگئی ہے ۔نیدرلینڈز ،سپین ، جرمنی اور بھارت کی ٹیمیں ٹاپ فور رائونڈ میں پہنچ چکی ہیں۔
مینز فیلڈ ہاکی ایونٹ کے دونوں سیمی فائنلز (کل) منگل کو کھیلے جائیں گے۔پیرس اولمپکس گیمز میں شائقین کو انتہائی دلچسپ اور کانٹے دار مقابلے دیکھنے کو مل رہے ہیں۔مینز فیلڈ ہاکی ایونٹ کے چاروں کوارٹر فائنل میچز کھیلے جاچکے ہیں۔پہلے کوارٹر فائنل میچ میں بھارت نے انگلینڈ کی ٹیم کو شکست دے کر سیمی فائنل کے لئے کوالیفائی کیا،دوسرے کوارٹر فائنل میچ میں سپین کے بیلجیئم کی ٹیم کو مات دے کر ٹاپ فور تک رسائی حاصل کی،تیسرے کوارٹر فائنل میچ میں نیدرلینڈز نے آسٹریلیا کو پچھاڑکر سیمی فائنل کے لئے کوالیفائی کیا جبکہ چوتھے اور آخری کوارٹر فائنل میچ میں جرمنی کی ٹیم نے ارجنٹائن کو شکست اور سیمی فائنل کے لئے کوالیفائی کرلیا۔
مینز فیلڈ ہاکی ایونٹ کا پہلا سیمی فائنل میچ کل منگل کو نیدرلینڈز اور سپین کی ٹیموں کے درمیان کھیلا جائے گا جبکہ اسی روز دوسرا سیمی فائنل میچ جرمنی اور بھارت کی ہاکی ٹیموں کے درمیان کھیلا جائے گا۔ تیسری پوزیشن کے لئے میچ 8 اگست کو کھیلا جائے گا جبکہ طلائی تمغہ کے لئے میچ بھی8 اگست کو کھیلا جائے گا۔
