لاہور۔20ستمبر (اے پی پی):پنجاب ایجوکیشن فانڈیشن پیف کے بورڈ آف ڈائریکٹر ز کا 85واں اجلاس بدھ کو یہاں صدر دفتر میں منعقد ہوا۔ اجلاس کی صدارت چیئرپرسن بورڈ آف ڈائریکٹر ز ڈاکٹر سعید شفقت ماہر تعلیم نے کی۔منیجنگ ڈائریکٹر پیف منظر جاوید علی نے تمام بورڈ ممبران کو پیف آمد پر خوش آمدید کہا اور منظوری کے لیے ایجنڈے پیش کئے۔ پیف بورڈ ممبران نے روشن تھل پراجیکٹ اگلے ماہ لانچ کرنے کی منظوری دے دی ، اس منصوبے کے تحت بھکر، میانوالی، خوشاب، جھنگ اور لیہ میں 3سو نئے سکول کھولے جائیں گے اور 18ہزار سے زائد آؤٹ آف سکول بچوں کو سکولوں میں لایا جائے گا۔
پیف بورڈ آف ڈائریکٹرز نے آفیسرز، ایگزیکٹو اسسٹنٹ، آفس اسسٹنٹ، آفس بوائے اور ڈرائیورز کی تنخواہوں میں 30فیصد اضافے کی منظوری بھی دی۔ پیف بورڈ نے ریسرچ ایڈوائزر کمیٹی بنانے کی منظوری بھی دے دی جو پیف کی جانب سے یونیورسٹیوں کو دیے گئے ٹاپکس کی ریسر چ کی ایویلیوایشن کریں گے، اس کے ساتھ ساتھ پیف بورڈ آف ڈائریکٹر ز نے ایم ای اوز کے الائونس میں بھی مزید اضافے کی منطوری دی تاکہ پیف ایم ای اوز با آسانی دور دراز علاقوں میں موجود سکولوں کی مانٹرنگ کر سکیں۔
ایم ڈی پیف نے اجلاس کو پیف ابراہیم ماڈل سکول کے بارے میں بھی تفصیل سے بتایا۔ بور ڈ نے ابراہیم ماڈل سکول کو سیکنڈری لیول سے ہائیر سیکنڈری لیول کرنے کی منظوری دی جس سے طلبا و طالبات کو ہائیر ایجوکیشن کے لیے دور دراز علاقوں میں نہیں جا نا پڑے گا۔ اجلاس میں دیگر اہم ایجنڈوں پر بھی سیر حاصل گفتگو ہوئی۔
اجلاس میں سیکرٹری لیٹریسی اینڈ نان فارمل بیسک ایجوکیشن سید حیدر اقبال، وائس چانسلر یونیورسٹی آف ایجوکیشن ڈاکٹر طلعت نصیر پاشا، سکول ایجوکیشن ڈیپارٹمنٹ سے نوید شہزاد مرزا (ایڈیشنل سیکرٹری ای آر، پلاننگ اینڈ ڈویلپمنٹ ڈیپارٹمنٹ سے حسن فاروق(اسسٹنٹ چیف، ایجوکیشن)، فنانس ڈیپارٹمنٹ سے میاں عبدالقاد ر شاہ، سوشل ویلفیئر ڈیپارٹمنٹ سے شاہین محبوب (ڈپٹی سیکرٹری) ڈاکٹر اعظم چوہدری (ماہر تعلیم)،ڈاکٹر باسط خان (، عاصمہ وزیری (ماہر تعلیم) نے شرکت کی۔
اجلاس میں پیف سے ڈ پٹی منیجنگ ڈائریکٹر (آپریشن) قراة العین میمن، ڈپٹی منیجنگ ڈائریکٹر (سپورٹ سروسز)راجہ محمد اشرف، ڈپٹی منیجنگ ڈائریکٹر فنانس (محمد فاروق) اور پیف کے دیگر سینئر افسران نے شرکت کی۔
