-کراچی۔ 13 مئی (اے پی پی):پیپلز پارٹی سندھ نے پاک بھارت جنگ بندی پر 15 مئی کو سندھ بھر میں اظہار تشکر ریلیاں نکالنے کا اعلان کردیا ہے۔ یہ اعلان پیپلز پارٹی سندھ کے صدر نثار کھوڑو نے اپنے جاری ایک پالیسی بیان میں کیا ۔نثار کھوڑو نے کہا کہ پیپلز پارٹی کی جانب سے پاک بھارت جنگ بندی پر 15 مئی بروز جمعرات شام 5 بجے سندھ کے تمام ضلعی ہیڈکوارٹرز میں اظہار تشکر ریلیاں نکالی جائینگی۔اس ضمن میں پیپلز پارٹی کی سندھ بھر کی تمام ضلعی تنظیمیں اپنے اپنے اضلاع میں اظہار تشکر ریلیاں نکالیں۔نثار کھوڑو نے کہا کہ امریکی صدر ڈونلڈ ٹرمپ کا شکریہ ادا کرتے ہیں
جنہوں نے دو ایٹمی ممالک کے درمیان جنگ بندی کرانے میں بھرپور کردار ادا کیا۔انہوں نے کہا کہ امریکی صدر نے پاک بھارت کشیدگی ختم کرواکر جنگ بندی کے متعلق اپنی انتخابی مہم کے نعرے پر عمل کرکے دکھایا ہے۔انہوں نے کہا کہ بھارتی جارحیت کا منہ توڑ جواب دینے اور جرات کا مظاہرہ کرنے پر فضائیہ، بحری اور پاک فوج کے جوانوں کو سلام پیش کرتے ہیں۔ پاکستان خطے میں امن کا خواہاں ہے اور جنگیں کسی مسئلے کا حل نہیں،مذاکرات ہی مسئلے کا حل ہیں۔نثار کھوڑو نے کہا کہ پاک بھارت سیز فائر کے بعد سندھ طاس معاہدے کے تنازعہ کو بھی حل ہونا چاہئے۔نثار کھوڑو نے کہا کہ چیئرمین بلاول بھٹو زرداری نے بین الاقوامی فورمز پر پاک بھارت کشیدگی کے خاتمے اور امن پسندی کی سوچ کے متعلق آواز اٹھا کر اپنا بھرپور کردار ادا کیا ہے۔
Short Link: https://urdu.app.com.pk/urdu/?p=596645
