لاہور۔29اپریل (اے پی پی):پاکستان سپر لیگ (پی ایس ایل) کے 18ویں میچ میں کوئٹہ گلیڈی ایٹرز نے ملتان سلطانز کو 10 وکٹوں سے شکست دے دی۔ قذافی اسٹیڈیم میں کھیلے جا نے والے میچ میں کوئٹہ گلیڈی ایٹرز کی نپی تلی بائولنگ کی بدولت ملتان سلطانز کی ٹیم 20 اوورز بھی پورے نہ کھیل سکی اور پوری ٹیم صرف 89 رنز پر ڈھیر ہوگئی۔
کوئٹہ نے ہدف کے تعاقب میں جارحانہ انداز اپنایا اور90 رنز کا ہدف ساتویں اوور میں ہی حاصل کر لیا، کپتان سعود شکیل نے 20 گیندوں پر 4 چھکوں اور 3 چوکوں کی مدد سے 42 رنز بنائے جبکہ فن ایلن نے21 گیندوں پر 45 رنز کی اننگز میں5 چھکے جڑ دیئے۔ملتان سلطانز کی جانب سے کوئی بھی باولر وکٹ حاصل نہیں کرسکا۔اس سے قبل کوئٹہ گلیڈی ایٹرز کے کپتان سعود شکیل نے ٹاس جیت کر پہلے فیلڈنگ کرنے کا فیصلہ کیا۔ملتان سلطانز کی جانب سے اننگز کا آغاز کرنے والے یاسر خان صرف5 رنز کے مہمان ثابت ہوئے،جس کے بعد آنے والے بلے باز عثمان خان اپنی تیسری ہی گیند پر کھاتہ کھولے بغیر پویلین واپس لوٹ گئے۔پچھلے میچ میں نصف سنچری بنانے والے کامران غلام بھی3 رنز بناکر آوٹ ہوگئے
جبکہ اپنا پہلا پی ایس ایل میچ کھیلنے والے آئرلینڈ کے کرٹس کیمفر 4 رنز ہی بناسکے،ابتدائی چاروں وکٹیں خرم شہزاد نے حاصل کیں۔افتخار احمد 6، مائیکل بریسویل صفر، ڈیوڈ ویلے 7، اسامہ میر 11، محمد حسنین 2 اور عبید شاہ1 رن بنا کر آوٹ ہوئے جبکہ کپتان محمد رضوان44 رنز پر ناٹ آوٹ رہے۔کوئٹہ گلیڈی ایٹرز کی جانب سے خرم شہزاد نے 4،فہیم اشرف اور محمد وسیم جونیئر نے 2،2 وکٹیں حاصل کیں۔
Short Link: https://urdu.app.com.pk/urdu/?p=589961
