اسلام آباد ۔ 07 مارچ (اے پی پی) پاکستان سپر لیگ (پی ایس ایل) کے چوتھے ایڈیشن میں چار مرحلوں کے اختتام کے بعد شین واٹسن بیٹنگ اور حسن علی باﺅلنگ کے شعبے میں سرفہرست ہیں۔ تفصیلات کے مطابق پی ایل ایس فور کا میلہ اب متحدہ عرب امارات سے پاکستان منتقل ہو چکا ہے۔ چار مرحلون کے اختتام کے بعد کوئٹہ گلیڈی ایٹرز اور پشاور زلمی کی ٹیموں نے چھ، چھ فتوحات کے ساتھ پلے آف میں جگہ بنا رکھی ہے جبکہ اسلام آباد یونائیٹڈ، کراچی کنگز اور لاہور قلندرز کے درمیان پلے آف میں جگہ بنانے کی دوڑ جاری ہے۔ اسلام آباد کی ٹیم چار فتوحات کے ساتھ تیسرے، کراچی کنگز چار فتوحات کے ساتھ چوتھے اور قلندرز تین کامیابیوں کے ساتھ پانچویں نمبر پر موجود ہے۔ اسلام آباد کا ایک جبکہ کنگز اور قلندرز کے دو، دو میچز باقی ہیں۔ اب تک کھیلے گئے میچز کے بعد بیٹنگ کے شعبے میں گلیڈی ایٹرز کے آسٹریلوی بلے باز شین واٹسن 332 رنز بنا کر سرفہرست ہیں۔
