راولپنڈی۔5مارچ (اے پی پی):پاکستان سپر لیگ (پی ایس ایل) میں (کل) بدھ کو مزید دو میچوں کا فیصلہ ہو گا ۔ پہلا میچ کراچی کنگز اور کوئٹہ گلیڈی ایٹرز جبکہ دوسرا میچ اسلام آباد یونائیٹڈ اور لاہور قلندرز کے درمیان کھیلا جائے ۔ دونوں میچ راولپنڈی کرکٹ سٹیڈیم میں کھیلے جائیں گے ۔ پی سی بی کے زیر اہتمام پی ایس ایل کے نویں ایڈیشن کے دلچسپ مقابلوں کا سلسلہ جاری ہے ۔ (کل) بدھ کو لیگ کے 22 ویں میچ میں کراچی کنگز اور کوئٹہ گلیڈی ایٹرز کی ٹیمیں مدمقابل ہوں گی ، میچ دوپہر 2 بجے شروع ہو گا ۔
کراچی کنگز کو شان مسعود لیڈ کریں گے ، دیگر نمایاں کھلاڑیوں میں شعیب ملک ، جیمز ونس ، حسن علی ، ٹم سیفرٹ ، بلیسنگ مزرابانی اور محمد نواز شامل ہیں۔ کوئٹہ گلیڈی ایٹرز جارح مزاج بیٹر رائلی روسو کی قیادت میں میدان میں اترے گی۔ اس ٹیم میں سرفراز احمد ، جیسن رائے ، عقیل حسین ، محمد وسیم اور سعود شکیل جیسے بہترین کھلاڑی شامل ہیں ۔ لیگ کا 23واں میچ اسلام یونائیٹڈ اور لاہور قلندرز کے درمیان کھیلا جائے گا ۔
یہ میچ شام 7 بجے شروع ہو گا ۔ اسلام آباد یونائیٹڈ کو آل راؤنڈر شاداب خان لیڈ کر رہے ہیں جبکہ انہیں کولن منرو ، ایلیکس ہیلز ، نسیم شاہ ، عماد وسیم ، جورڈن کوکس اور فہیم اشرف جیسے تجربہ کار کھلاڑیوں کی خدمات حاصل ہیں۔ لاہور قلندرز فاسٹ باؤلر شاہین شاہ آفریدی کی زیر قیادت میدان میں اترے گی ۔ فخر زمان ، راسی وین ڈر ڈاسن ، سکندر رضا ، کارلوس براتھویٹ، زمان خان اور صاحبزادہ فرحان اس ٹیم کا حصہ ہیں ۔
 مزید دو میچوں کا فیصلہ ہو گا){kind=link}