ملتان۔ 19 مارچ (اے پی پی):پی ایس ایل سیزن 10 کی ٹرافی ملتان پہنچ گئی۔تفصیلات کے مطابق پاکستان سپر لیگ سیزن 10 کی منفرد اور چمچاتی ٹرافی دی "لومینارا” کا پاکستان کے مختلف شہروں کا سفر جاری ہے،پی ایس ایل سیزن10 ٹرافی کی مختلف شہروں میں رونمائی کروائی جا رہی ہے،کراچی، حیدر آباد اور لاہور کے بعد گزشتہ روز پی ایس ایل 10 ٹرافی ملتان پہنچی، ملتان کرکٹ اسٹیڈیم میں ٹرافی کی رونمائی کروائی گئی۔
جس کے بعد ٹرافی کو معروف مذہبی و روحانی پیشوا حضرت شاہ رکن عالم کے مزار پر لیجا کر رکھا گیا،جہاں شائقین کرکٹ نے ٹرافی کے ساتھ سیلفیاں بنوائیں۔ٹرافی ترین اکیڈمی بھی لے جائی گئی،جہاں اولمپک گولڈ میڈلسٹ ایتھلیٹ ارشد ندیم بھی ٹرافی کے ساتھ موجود رہے،ٹرافی رونمائی میں کثیر تعداد میں بچوں نے بھی شرکت کی، جنہوں نے ٹرافی کے ساتھ تصاویر بنوائیں۔واضح رہے کہ دنیا کی مقبول ترین کرکٹ لیگز میں سے ایک پاکستان سپر لیگ کے دسویں سیزن کا میلہ آئندہ ماہ سجنے کو تیار ہے۔
Short Link: https://urdu.app.com.pk/urdu/?p=574276
