اسلام آباد ۔ 11 جون (اے پی پی) آئندہ مالی سال 2019-20ءکے سرکاری شعبے کے سالانہ ترقیاتی پروگرام کے تحت سائنس اینڈ ٹیکنالوجیکل ریسرچ ڈویژن کے جاری اور نئی سکیموں کے لئے مجموعی طور پر 7ارب 40کروڑ 73لاکھ روپے کے فنڈز مختص کئے گئے ہیں۔ منگل کو جاری ہونے والے پی ایس ڈی پی کے مطابق جاری سکیموں میں گوادر میں پی ایس ٹی سی کے قیام کے لئے 26کروڑ ، وژن 2025ءکے تحت ایس ایم ای کے لئے 10کروڑ ، فرسٹ انڈسٹریل انوویشن سروے کے لئے 2 کروڑ ، سائنس ٹیلنٹ فارمنگ سکیم کے لئے 15کروڑ روپے کے فنڈز مختص کئے ہیں جبکہ نئی سکیموں میں ریسرچ پروگرام کے لئے 26کروڑ 90لاکھ ، سکلز ڈویلپمنٹ انٹرنیشنل سکالرشپس کے لئے 80کروڑ ، سینٹر فار ایڈوانس ٹیکنالوجی کے قیام کے لئے 67کروڑ 11لاکھ ،نیشنل سینٹر فار انڈسٹریل بائیو ٹیکنالوجی کے قیام کے لئے 15کروڑ ، پاک چائنا یونیورسٹی آف انجینئرنگ اینڈ ایمرجنگ ٹیکنالوجی کے لئے ایک ارب 50کروڑ روپے، نیشنل سینٹر فار ریسرچ اینڈ انوویش کے لئے 2ارب 50کروڑ روپے سمیت مختلف ترقیاتی منصوبوں کے لئے فنڈز مختص کئے گئے ہیں۔
