لاہور۔2مئی (اے پی پی):پاکستان فرنیچر کونسل کا وفد چیف ایگزیکٹو آفیسر میاں کاشف اشفاق کی سربراہی میں جمعہ کو چین کے ایک ہفتے کے دورے پر روانہ ہو گیا۔ ترجمان کے مطابق دورے کا مقصد دو طرفہ تعاون کو مضبوط اور پاکستان کی فرنیچر کی برآمدات کو فروغ دینا ہے، یہ دورہ فرنیچر سیکٹر کی عالمی مسابقت کو بڑھانے، چین کی وسیع مارکیٹ تک رسائی اور اس کی جدید مینوفیکچرنگ مہارت سے فائدہ اٹھانے کی کوششوں کا عکاس اور برآمدات کو متنوع بنانے و عالمی ویلیو چینز کے ساتھ انضمام کے وسیع تر حکومتی ایجنڈے کے ساتھ ہم آہنگ ہے۔
پی ایف سی پاکستان کو گھریلو، تجارتی اور ہوٹل فرنیچر کی صنعت میں ایک اہم کھلاڑی کے طور پر متعارف کرانے کے لیے پر عزم ہے، دورے سے سی پیک کے فریم ورک کے تحت برآمدات، باہمی تعاون اور تزویراتی شراکت داری کو فروغ حاصل ہو گا۔ میاں کاشف اشفاق نے پاکستانی مصنوعات کو بین الاقوامی معیار سے ہم آہنگ کرنے کے لیے جدید ٹیکنالوجی، ڈیزائنوں اور پائیدار طریقوں کو اپنانے پر زور دیا۔
انہوں نے کہا کہ دورے کے دوران مقامی پیداواری سہولیات کو اپ گریڈ کرنے اور مہارتوں کی ترقی کو فروغ دینے کے لیے چینی سرمایہ کاری کو راغب کرنے پر بھی توجہ مرکوز کی جائے گی۔وفد چینی فرنیچر مینوفیکچررز، انڈسٹری لیڈرز اور سرکاری حکام کے ساتھ مشترکہ منصوبوں، ٹیکنالوجی کی منتقلی اور مارکیٹ تک رسائی کے مواقع کے حصول کے لیے بات چیت کرے گا۔
Short Link: https://urdu.app.com.pk/urdu/?p=591453
