راولپنڈی۔18اپریل (اے پی پی):پارکس اینڈ ہارٹیکلچر اتھارٹی (پی ایچ اے) راولپنڈی پارکوں اور گرین بیلٹس کو خوبصورت بنانے اور شہریوں کو بہترین تفریحی کے لیے تیزی سے کام کر رہی ہے۔ ترجمان کے مطابق ڈی جی پی ایچ اے کی ہدایت پر شاہ سلطان پارک کو رنگ برنگے پھولوں اور پودوں سے سجا دیا گیا ہے۔ پارک میں پھولوں کی بہار نے دلکش مناظر پیش کیے ہیں جس سے نہ صرف پارک کی خوبصورتی میں اضافہ ہوا ہے بلکہ تازگی کا احساس بھی اجاگر ہوا ہے۔ شاہ سلطان پارک میں شام کے اوقات میں شہریوں کی بڑی تعداد سیر و تفریح کے لیے آتی ہے جہاں وہ بہترین سہولیات سے لطف اندوز ہوتے ہیں۔
ڈی جی پی ایچ اے کی ہدایات پر پارک میں سکیورٹی کے بھی بہترین انتظامات کیے گئے ہیں تاکہ شہری محفوظ ماحول میں تفریح کر سکیں۔ پی ایچ اے کا عملہ بھی بھرپور محنت سے باغبانی کا کام انجام دے رہا ہے اور پھولوں و پودوں کی نگہداشت کر رہا ہے۔ ڈی جی پی ایچ اے احمد حسن رانجھا نے کہا ہے کہ شہریوں کی تفریح کے لیے بہترین اقدامات کیے جا رہے ہیں اور اس میں کسی قسم کی کوتاہی برداشت نہیں کی جائے گی۔ انہوں نے مزید کہا کہ راولپنڈی کو خوبصورت و سرسبز بنانے کا عزم رکھتے ہیں اور عوام کو ایک خوشگوار اور صحت مند تفریحی ماحول فراہم کرنا ہماری اولین ترجیح ہے۔
Short Link: https://urdu.app.com.pk/urdu/?p=584284
