پی سی ایم ای اے، ٹی ڈیپ کے زیر اہتمام ہاتھ سے بنے قالینوں کی 41 ویں عالمی نمائش7 اکتوبر سے شروع ہو گی،ٹڈیپ کی مشاورت سے غیر ملکی خریداروں کی فہرست مرتب کی جائے گی، عتیق الرحمان اسلام آباد۔27اپریل (اے پی پی):پاکستان کارپٹ مینو فیکچررز اینڈ ا یکسپورٹرز ایسوسی ایشن اور ٹریڈ ڈویلپمنٹ اتھارٹی پاکستان (ٹی ڈیپ) کے زیر اہتمام ہاتھ سے بنے قالینوں کی تین روزہ 41 ویں عالمی نمائش رواں سال 7 تا 9 اکتوبر کو لاہور کے مقامی ہوٹل میں منعقد ہو گی، عالمی نمائش میں ہاتھ سے بنے قالینوں کی صنعت سے وابستہ مینو فیکچررز اور ایکسپورٹرز اپنے سٹالز لگائیں گے۔ پی سی ایم ای اے کے اجلاس میں پیٹرن انچیف عبد اللطیف ملک، چیئرمین میاں عتیق الرحمان، وائس ریاض احمد، چیئر پرسن کارپٹ ٹریننگ انسٹی ٹیو ٹ اعجاز الرحمان، سینئر رہنما عثمان اشرف، میجر (ر) اختر نذیر اور سعید خان سمیت دیگر شریک ہوئے۔ میاں عتیق الرحمان اور ریاض احمد نے کہا کہ ٹریڈ ڈویلپمنٹ اتھارٹی پاکستان کی مشاورت سے غیر ملکی خریداروں کی فہرست کو مرتب کیا جائے گا، رواں سال بھی عالمی نمائش کی موثر اور جدید تقاضوں کے مطابق تشہیر کو یقینی بنایا جائے گا۔ انہوں نے کہا کہ ہاتھ سے بنے قالینوں کی صنعت سے وابستہ افراد کی عالمی نمائش سے بڑی امیدیں وابستہ ہیں، عالمی نمائش کو مستقبل کے تناظر میں دیکھ رہے ہیں جس کے تحت پاکستان آنے والے غیر ملکی خریداروں سے طویل المدت بنیادوں پر رابطوں کو استوار کرنے کے لئے دو طرفہ ملاقاتوں کا بھی اہتمام کیا جائے گا۔ انہوں نے کہا کہ ٹریڈ ڈویلپمنٹ اتھارٹی پاکستان کی جانب سے ہر طرح کی معاونت فراہم کرنے کی یقین دہانی کرائی گئی ہے جو اطمینان کا باعث ہے جبکہ دیگر متعلقہ اداروں سے بھی اپیل ہے کہ پاکستان میں منعقد ہونے والے عالمی ایونٹ کی کامیابی کیلئے بھرپور تعاون فراہم کریں، بیرون ملک پاکستانی سفارتخانوں کو پابند کیا جائے کہ وہ ویزوں کے حصول میں آسانی پیدا کریں تاکہ غیر ملکی خریداروں کو سفر میں کسی طرح کی رکاوٹ کا سامنا نہ کرنا پڑے۔ انہوں نے کہا کہ عالمی نمائش کی کامیابی کیلئے کوئی کسر اٹھا نہیں رکھی جائے گی، تیاریوں کے حوالے سے آنے والے دنوں میں کمیٹیاں تشکیل دے کر ذمہ داریاں تفویض کی جائیں گی۔ انہوں نے حکومت اور ٹریڈ ڈویلپمنٹ اتھارٹی سے درخوا ست کی کہ میگا ایونٹ کی کامیابی کیلئے ہمارے شانہ بشانہ چلا جائے تاکہ عالمی ایونٹ کے انعقاد سے سو فیصد نتائج حاصل ہو سکیں۔