اسلام آباد۔14اکتوبر (اے پی پی):پاکستان مسلم لیگ (ن) کے سینئر رہنما اور سینیٹر عرفان صدیقی نے پاکستان کی ترقی میں مسلسل رکاوٹیں ڈالنے پر پی ٹی آئی کو تنقید کا نشانہ بنایا اور ان پر زور دیا کہ وہ ملک کی بہتری کے لئے قومی وقار کو ترجیح دیں۔پیر کو نجی ٹی وی کے ساتھ خصوصی گفتگو میں انہوں نے کہا کہ پی ٹی آئی ملکی ترقی میں خلل ڈالنے کی عادی ہے، سیاسی پوائنٹ سکورنگ سے زیادہ حب الوطنی کی ضرورت ہے۔
انہوں نے کہا کہ مسلم لیگ (ن) اور پیپلز پارٹی کے سینئر رہنماؤں کو جیلوں میں ڈالے جانے کے باوجود بلیک میلنگ کے ہتھکنڈوں سے ملکی معاملات خراب نہیں ہونے دیئے، پی ٹی آئی ملک میں انتشار پھلانے کی بجائے ملک کی فلاح و بہبودکے لئےکام کرے۔ان کا کہنا تھا کہ پی ٹی آئی کی تاریخ رہی ہے کہ جب بھی اہم ایونٹس منظر عام پر آتے ہیں تو وہ پریشانی کا باعث بنتے ہیں، ماضی میں انہوں نے چینی صدر کے دورہ پاکستان میں خلل ڈالا اور اب وہ دوبارہ ایسا کرنے کے لیے تیار ہیں۔
انہوں نے کہا کہ پی ٹی آئی کی ان حرکات سے صرف ملکی مفادات کو نقصان پہنچے گا۔ ایک سوال کا جواب دیتے ہوئےانہوں نے کہا کہ اگر پی ٹی آئی رہنما کو قید کیا جائے تو بھی پارٹی مؤثر طریقے سے کام کر سکتی ہے، جیسا کہ مسلم لیگ ن اور پی پی پی نے اسی طرح کے حالات میں کیا تھا۔”درحقیقت، تاریخ بتاتی ہے کہ مسلم لیگ (ن) اور پیپلز پارٹی اپنے سینئر رہنماؤں کو جیلوں میں ڈالنے کے باوجود آسانی سے کام کرتی رہیں۔مثال کے طور پر نواز شریف کی قید کے دوران مسلم لیگ (ن) ایک مضبوط اپوزیشن رہی اور اسی طرح جب آصف علی زرداری جیل میں تھے تو پیپلز پارٹی نے اپنی سیاسی سرگرمیاں جاری رکھیں۔
ایک اور سوال کے جواب میں انہوں نے کہا کہ نئے چیف جسٹس کے نوٹیفکیشن کے حوالے سے تعاون اور بات چیت جاری ہے۔ایک سوال کے جواب میں انہوں نے مزید کہا کہ پاکستان مسلم لیگ نواز ن کے قائد محمد نواز شریف آئینی ترمیم کے حوالے سے پاکستان پیپلز پارٹی (پی پی پی) کے سربراہ بلاول بھٹو سے رابطے میں ہیں،یہ ترمیم بے نظیر بھٹو کے نامکمل ایجنڈے کا ایک اہم حصہ ہےاور نواز شریف نے بلاول کو یقین دلایا ہے کہ وہ اس پر جلد عملدرآمد کے لیے مل کر کام کریں گے۔
