پی ٹی آئی کی علامتی بھوک ہڑتال محض ڈرامہ بازی ہے، چار گھنٹے کی بھوک ہڑتال نہیں "چڑی روزہ” ہوتا ہے، طلال چوہدری

اسلام آباد۔24جولائی (اے پی پی): مسلم لیگ (ن) کے رہنما طلال چوہدری نے کہا ہے کہ پی ٹی آئی کی علامتی بھوک ہڑتال محض ڈرامہ بازی ہے، چار گھنٹے کی بھوک ہڑتال نہیں "چڑی روزہ” ہوتا ہے۔ بدھ کو یہاں سے جاری ایک بیان میں انہوں نے کہا کہ دوپہر کے کھانے کے بعد اور شام کی چائے سے پہلے کون سی بھوک ہڑتال ہوتی ہے؟ جس کے لئے یہ بھوک ہڑتال کر رہے ہیں وہ جیل میں کاجو، بادام اور دیسی مرغ کھا رہا ہے۔ انہوں نے کہا کہ ہڑتال کرنا ان کا آئینی حق ہے لیکن لنچ کے بعد صرف 4 گھنٹے کی بھوک ہڑتال کرتے ہیں، پی ٹی آئی کے ان رہنمائوں کوبانی پی ٹی آئی کے اعترافی بیان پر بھوک ہڑتال کرنی چاہئے، انہیں بانی پی ٹی آئی کے 9 مئی واقعہ کا اعترافی بیان دینے کے بعد پولی گرافک ٹیسٹ سے انکار اور عمران نیازی کے دوغلے پن پر بھی بھوک ہڑتال کرنی چاہئے، ان کا اعترافی بیان 9 مئی کے واقعات کا اقبال جرم ہے۔طلال چوہدری نے کہا کہ بانی پی ٹی آئی کے رشتہ دار سانحہ نو مئی والے دن موقع پر موجود تھے اور لوگوں کو ہدایات دیتے رہے، تحریک انصاف نے ہمیشہ پاکستان کو کمزور کرنے کی سازش کی، یہ کبھی بھوک ہڑتال اور کبھی پاکستان کو بند کرنے کی سازش کرتے رہے۔ انہوں نے کہا کہ بانی پی ٹی آئی کے ماضی کے ناقد محمود اچکزئی بھوک ہڑتالی کیمپ میں نوکری کی تلاش میں ہیں، یہ جتنی مرضی ہڑتالیں کرلیں، ان کے ہاتھ کچھ نہیں آنے والا، تحریک انتشار کا جمعہ والا شو بھی فلاپ ہوگا۔

Short Link: https://urdu.app.com.pk/urdu/?p=487091