لاہور۔9جولائی (اے پی پی):وزیراطلا عات پنجاب عظمی بخاری نے کہا ہے کہ پی ٹی آ ئی کے پنجاب میں چار سال کرپشن، نااہلی اور لوٹ مار کا سیاہ ترین دور تھا،علی امین گنڈا پور اور بیرسٹر سیف کی اگلی منزل اڈیالہ ہی نظر آرہی ہے۔بدھ کے روز مشیر اطلاعات خیبر پختونخوا بیرسٹر سیف کے بیان پر ردعمل دیتے ہوئے
انہوں نے کہا کہ مسٹرجعلی دانشور آڈٹ رپورٹ غور سے پڑھیں،اس میں پی ٹی آئی قیادت کا کچا چٹھہ موجود ہے،جس آڈٹ رپورٹ کا پی ٹی آئی والے ڈھنڈورا پیٹ رہے ہیں وہ رپورٹ بزدار اور پرویز الہی دورکی ہے۔عظمی بخاری نے کہا کہ جس 10 کھرب کا آپ واویلا کررہے ہیں، وہ 2018 سے 2023 کی گندم خریداری اور سبسڈی کا ہے، 2018 سے 2023 تک پنجاب میں کس کی حکومت تھی ،پوری قوم جانتی ہے۔
صوبائی وزیر اطلاعات نے کہا کہ چار سال پنجاب میں کرپشن، نااہلی اور لوٹ مار کا سیاہ ترین دور تھا، 12 سال سے جو لوٹ مار خیبرپختونخوا میں ہو رہی ہے ،چار سال پنجاب میں وہی لوٹ مار ہوئی۔عظمی بخاری نے مزید کہا کہ شریف فیملی کے بغض میں پی ٹی آ ئی کا لیڈروزیراعظم ہائو س سے ڈائری اٹھا کر اڈیالہ پہنچ گیا، علی امین اور بیرسٹر سیف کے کارناموں کا انجام بھی”نیکسٹ سٹاپ اڈیالہ” ہی نظر آرہا ہے۔
