لاہور۔31اگست (اے پی پی):پی ڈی ایم اے پنجاب کا دریائے ستلج، راوی، چناب اور ملحقہ ندی نالوں میں انتہائی اونچے درجے کے سیلاب کا الرٹ جاری کردیا ۔ترجمان کے مطابق یکم سے 5ستمبر تک دریائے راوی، ستلج اور چناب میں انتہائی اونچے درجے کے سیلاب کا خدشہ ہے۔ دریائے ستلج میں مزید اونچے درجے کے سیلاب کا خدشہ ،گنڈا سنگھ والا کے مقام پر اونچے درجے کے سیلاب کی صورتحال برقرار رہے گی۔ 3 ستمبر تک دوران دریائوں کے بالائی حصوں میں شدید بارشوں کا امکان ہے۔ اگلے 24 گھنٹوں میں دریائے چناب ہیڈ تریموں کے مقام پر انتہائی اونچے درجے کا سیلاب ہوگا۔
پی ڈی ایم اے کی جانب سے پنجاب کا متعلقہ تمام کمشنرز و ڈپٹی کمشنرز کو الرٹ کردیا گیا ہے ۔ ترجمان کے مطابق صوبائی دارالحکومت لاہور، ساہیوال،گوجرانوالہ، سرگودھا، فیصل آباد ، بہاولپور، ملتان اور ڈیرہ غازی خان کے کمشنرز کو الرٹ جاری کردیا گیا ہے اور اسی طرح سیالکوٹ، شیخوپورہ، لاہور، قصور، ننکانہ صاحب، اوکاڑہ، فیصل آباد، ساہیوال، ٹوبہ ٹیک سنگھ، گجرات، سیالکوٹ، وزیر آباد، گجرانوالہ، منڈی بہاوالدین، حافظ آباد، سرگودھا، چنیوٹ، خانیوال، کوٹ ادو ،جھنگ ،رحیم یار خان، راجنپور، پاکپتن، بہاولنگر، وہاڑی، لودھراں، لیہ، ملتان، بہاولپور، مظفر گڑھ اور راجنپور کے ڈپٹی کمشنرز کو بھی الرٹ جاری کردیا گیا ہے ۔
ریلیف کمشنر پنجاب نبیل جاوید نے کمشنرز، ڈپٹی کمشنرز اور دیگر حکام کو ممکنہ صورتحال بارے الرٹ رہنے کی ہدایات جاری کرتے ہوئے کہا ہے کہ لوکل گورنمنٹ، محکمہ زراعت، محکمہ آبپاشی، محکمہ صحت، محکمہ جنگلات، لائیو اسٹاک اور محکمہ ٹرانسپورٹ کو بھی الرٹ جاری کر دیا گیا ہے۔
ڈی جی پی ڈی ایم اے عرفان علی کاٹھیا نے بھی متعلقہ محکموں کو الرٹ رہنے کی ہدایات جاری کرتے ہوئے کہا ہے اور وزیر اعلی پنجاب کی ہدایات کے پیش نظر تمام تر انتظامات مکمل ہیں۔ایمرجنسی کنٹرول رومز میں سٹاف الرٹ ہے۔ ڈی جی نے کہا کہ عوام جاری کردہ احتیاطی تدابیر پر عمل کریں۔ہنگامی انخلا کی صورت میں انتظامیہ سے تعاون کریں ۔شہری ایمرجنسی کی صورت میں پی ڈی ایم اے کی ہیلپ لائن 1129پر رابطہ کریں۔
