لاہور۔5مئی (اے پی پی):صوبائی وزیر صنعت و تجارت چوہدری شافع حسین نے ڈیفنس روڈ بوبتیاں چوک پر شو میکنگ فیکٹری کا دورہ کیا۔صوبائی وزیر نے فیکٹری میں جوتے کی تیاری کے مختلف مراحل کا مشاہدہ کیا۔یہ فیکٹری چین کی زونگ لین ٹریڈنگ کمپنی کے زیر اہتمام قائم ہے۔چائنیز بزنس کونسل پاکستان کے صدر چن کیانگ جیانگ نے صوبائی وزیر کو شو میکنگ کے مختلف مراحل سے آگاہ کیا۔صوبائی وزیر نے فیکٹری میں چائنیز بزنس کونسل کے صدر چن کیانگ جیانگ و دیگر عہدیداران اور چین کے سرمایہ کاروں سے ملاقات کی۔ملاقات میں پنجاب میں چائنا بزنس پارک کے قیام کیلئے مختلف آپشنز کا جائزہ لیا گیا۔
چائنیز بزنس کونسل کے سربراہ نے بزنس کونسل کی کاروباری اور فلاحی سرگرمیوں سے آگاہ کیا۔صوبائی وزیر صنعت و تجارت چوہدری شافع حسین نے اس موقع پر گفتگو کرتے ہوئے کہاکہ پنجاب حکومت شو انڈسٹری کے فروغ کیلئے قائد اعظم بزنس پارک شیخوپورہ میں شو سٹی بنانے کا جائزہ لے رہی ہے۔چین کی سرمایہ کار کمپنیوں کیلئے علیحدہ چائنا بزنس پارک کے قیام کیلئے حکومت ہر ممکن تعاون فراہم کرے گی۔چائنیز بزنس کونسل چائنا بزنس پارک کے قیام کیلئے اپنا حتمی پلان دے۔چوہدری شافع حسین نے کہاکہ فیڈمک کے زیر اہتمام انڈسٹریل اسٹیٹ میں چائنیز اور غیر ملکی سرمایہ کاروں کے لئے کمیونٹی سینٹر بنایا جائے گا۔پنجاب کے سپیشل اکنامک زونز میں غیر ملکی سرمایہ کاروں کے لئے شاندار مواقع موجود ہیں۔
صدر چائنیز بزنس کونسل چن کیانگ جیانگ نے کہاکہ چائنیز بزنس کونسل میں شامل 19سرمایہ کار کمپنیاں پنجاب کے مختلف شعبوں میں سرمایہ کاری کیلئے تیار ہیں،ان چائنیز کمپنیوں کی سرمایہ کاری کیلئے90 ایکڑ رقبے پر علیحدہ چائنیز بزنس پارک کی ضرورت ہے۔صدر چائنیز بزنس کونسل نے کہاکہ چین کی شو میکنگ فیکٹری نے مقامی سطح پر جدید ٹیکنالوجی متعارف کرائی ہے،مقامی لوگوں کو روزگار کے مواقع بھی فراہم کئے ہیں۔
Short Link: https://urdu.app.com.pk/urdu/?p=592750
