لاہور۔18مارچ (اے پی پی):صوبائی وزیر صنعت و تجارت چوہدری شافع حسین سے لائیو سٹاک ، فارماسیوٹیکل اور دیگر شعبوں سے وابستہ آذربائجان کے تجارتی وفد نے ملاقات کی ۔محکمہ صنعت و تجارت کے کمیٹی روم میں ہونے والی ملاقات میں پاکستان اور آذربائجان کے مابین تجارت بڑھانے کے امور پر بات چیت ہوئی ۔صوبائی وزیر نے مختلف شعبوں میں سرمایہ کاری کے مواقع سے آگاہ کیا ۔صوبائی وزیرنے وفد سے گفتگو کرتے ہوئے کہا کہ پاکستان اور آذربائجان کے مابین تجارت بڑھانے کا بہترین وقت ہے۔ پنجاب میں سرمایہ کاری کیلئے سازگار ماحول موجود ہے اور سرمایہ کاروں کو بہترین سہولیات فراہم کی جا رہی ہیں ۔
انہوں نے بتایا کہ پنجاب ایگریکلچر اینڈ میٹ کمپنی اور آذربائجان کی کمپنی کے درمیان میٹ کمپنی کے بند پلانٹ کو چلانے کا معاہدہ ہوچکا ہے ۔معاہدے کے تحت آذربائجان کی کمپنی بند پلانٹ کو چلائے گی اور پنجاب حکومت کو پلانٹ کے رینٹ کی مد میں ہرماہ خاطر خواہ رقم فراہم کرے گی جبکہ پیمکو پلانٹ کو چلانے کیلئے آذربائجان کی کمپنی کو ہر ممکن سہولیات دے گی ۔پلانٹ کے چلنے سے گوشت کی برآمد بڑھے گی ۔انہوں نے کہا کہ آذربائجان کے ساتھ ریفائنری اور سیاحت کے شعبہ میں تعاون بڑھایا جاسکتا ہے ۔
اس طرح آذربائجان اور روس کو درکار اشیا کی برآمدات بڑھانے کا جائزہ لینے کی بھی ضرورت ہے ۔آذربائیجان کا وفد درکار اشیا کی فہرست دے حکومت ان اشیا کی برآمد کا اہتمام کرے گی ۔ چوہدری شافع حسین نے کہا کہ پاکستان سے فارماسیوٹیکل کی مصنوعات یورپ اور دیگر ممالک کو برآمد ہورہی ہیں۔ فارماسیوٹیکل مصنوعات کی برآمدات میں اضافے کیلئے مزید اقدامات کئے جائیں گے۔
وفد کے سربراہ مسٹر بابک نے کہا کہ پاکستان کے ساتھ تجارت بڑھانا چاہتے ہیں ۔آذربائیجان کی حکومت پاکستان میں 2ارب ڈالر کی سرمایہ کاری کرنے جا رہی ہے۔وفد میں پریگما فارم کے بانیگیبل ایز گروو،مسٹر بابک اور دیگر شامل تھے ۔پنجاب سرمایہ کاری بورڈ کے ڈائریکٹر ڈاکٹر عمران ہاشمی بھی ملاقات میں موجود تھے ۔
Short Link: https://urdu.app.com.pk/urdu/?p=573968
