چوہدری شجاعت سے مولانا عبد الخبیر آزاد کی ملاقات،ملک کو درپیش چیلنجز پر تبادلہ خیال

لاہور۔28مارچ (اے پی پی):سابق وزیر اعظم چوہدری شجاعت حسین سے چیئرمین مرکزی رویت ہلال کمیٹی مولانا عبدالخبیر آزاد نے ان کی رہائش پر ملاقات کی جس میں امن وامان کی صورتحال،ملک کو درپیش چیلنجز،اتحادو یگانگت اور باہمی دلچسپی کے امور پر بات چیت ہوئی۔صوبائی وزیر اوقاف ومذہبی امور چوہدری شافع حسین بھی ملاقات میں موجود تھے۔

ملاقات میں خاتم النبیین یونیورسٹی کی بحالی اور قرآن کمپلیکس سے استفادہ کرنے کیلئے مختلف تجاویز پر بھی غور کیا گیا۔سابق وزیر اعظم چوہدری شجاعت حسین نے اس موقع پر گفتگو کرتے ہوئے کہا کہ ملک کو دہشتگردی سمیت دیگر مختلف چیلنجز کا سامنا ہے۔باہمی اتحاد کی قوت سے ہی ملک کو مشکلات کی دلدل سے نکالا جاسکتا ہے۔انہوں نے کہا کہ اتحاد کی جتنی آج ضرورت ہے شاید پہلے کبھی نہ ہو۔دہشت گردی کے ناسور کو جڑ سے اکھاڑ پھینکنے کیلئے سب کو مل کر آگے بڑھنا ہے۔

ملک کو دہشت گردی اور انتہا پسندی سے نجات دلانے کیلئے علما اور مشائخ کو کلیدی کردار ادا کرنا ہے۔وقت کی ضرورت ہے کہ محراب و منبر سے اتحاد کے فروغ کی آواز بلند ہو،چوہدری شجاعت حسین نے کہا کہ علما کرام،مشائخ عظام اور دینی سکالرز معاشرے میں رواداری،برداشت اور بھائی چارے کے جذبات کو فروغ دیں۔انہوں نے کہا کہ قرآن اکیڈمی بڑی محنت سے بنائی گئی تھی لیکن بدقسمتی سے اس پر توجہ نہیں دی گئی۔چوہدری شافع حسین کو قرآن کمپلیکس کے معاملات ٹھیک کرنے کا کہا ہے۔

چوہدری شجاعت حسین نے رویت ہلال کمیٹی کے امور میں بہتری لانے میں عبدالخبیر آزاد کی خدمات کو سراہا۔صوبائی وزیر اوقاف ومذہبی امور چوہدری شافع حسین نے کہا کہ محکمہ اوقاف و مذہبی امور کے پورے نظام کو کمپیوٹرائزڈ کیا جارہا ہے۔مساجد اور مزارات میں صفائی کے نظام کو بھی بہتر کیا جا رہا ہے۔انہوں نے کہا کہ محکمہ اوقاف و مذہبی امور کے معاملات کی بہتری کیلئے علما کرام اور دینی سکالرز سے مشاورت کا عمل جاری ہے۔

مولانا عبدالخبیر آزاد نے کہا کہ چوہدری شجاعت حسین کا گھر وحدت کی علامت ہے جہاں سے سب راہنمائی حاصل کرتے ہیں۔چوہدری شجاعت حسین شرافت اور رواداری کی علامت ہیں جنہیں دیکھ کر پرانی یادیں تازہ ہو جاتی ہیں۔انہوں نے کہا کہ مولاناعبد القادر آزاد مرحوم کے امت مسلمہ کے اتحاد کے مشن کو لے کر آگے بڑھ رہے ہیں۔

Short Link: https://urdu.app.com.pk/urdu/?p=576979