لاہور۔20جنوری (اے پی پی):وزیر اعلی پنجاب مریم نواز شریف کی خصوصی ہدایات پر وائس چیئرمین واسا چوہدری شہباز احمد نے ٹکہ چوک میں زیر تعمیر واٹر ٹینک کا دورہ کیا اور جاری کاموں پر پیش رفت کا جائزہ لیا ۔اس موقع پر ڈی ایم ڈی واسا عبد الطیف بھی ان کے ہمراہ تھے۔
ڈائریکٹر پراجیکٹ ابوبکر عمران نے وائس چیئرمین واسا کو تفصیلی بریفنگ دی اور کہا کہ حسین پارک ٹکہ چوک زیر زمین واٹر ٹینک منصوبہ 56 کروڑ کی لاگت سے مکمل کیا جائے گا،اس منصوبے کو3 ماہ میں مکمل کر لیا جائے گا۔بریفنگ میں بتایا گیا کہ منصوبے سے 15 لاکھ گیلن بارشی پانی کو محفوظ کیا جا سکے گا جبکہ منصوبے کی تکمیل سے قبل بارش سے جی بلاک مارکیٹ سے ٹکہ چوک تک ٹریفک کی روانی متاثر رہتی تھی، منصوبے کی تکمیل کے بعد ٹریفک رواں دواں رہے گی اور بارشی پانی بروقت واٹر ٹینک میں جمع ہو جائے گا۔وائس چیئرمین واسا نے ہدایت کرتے ہوئے کہا کہ منصوبے کی تعمیر میں معیاری مواد کا استعمال یقینی بنایا جائے، کام کو مقررہ مدت میں مکمل کرنے کے لیے تمام وسائل بروئے کار لائے جائیں۔
انہوں نے کہا کہ تعمیراتی عمل میں شفافیت کو ہر حال میں برقرار رکھا جائے،منصوبے کی روزانہ پیش رفت کی رپورٹ پیش کی جائے۔وائس چیئرمین واسا نے کہا کہ واسا کا مقصد شہریوں کو بہتر اور معیاری سہولیات فراہم کرنا ہے، جس کے لیے تمام وسائل بروئے کار لائے جا رہے ہیں۔
Short Link: https://urdu.app.com.pk/urdu/?p=548722
