ریاض۔25مارچ (اے پی پی):ولی عہد شہزادہ محمد بن سلمان پراجیکٹ کے دوسرے مرحلے میں الباحہ ریجن کی کمشنری بلجرشی کی قدیم مسجد کی تعمیر نو کا کام مکمل کر لیا گیا، مسجد الصفا 1350 سال قبل تعمیر کی گئی تھی۔
اردو نیوز کے مطابق مسجد الصفا کی عمارت کو اسی انداز میں تعمیر کیا گیا ہے جس طرح اسے روز اول بنایا گیا تھا۔مسجد کی عمارت کی تعمیر نو میں الباحہ کمشنری میں پائے جانے والی سروات چٹان کے پتھر اور وہاں کے درختوں کے تنوں کو چھت اور ستونوں کے لئے استعمال کیا گیا ہے۔مسجد الصفا کا مجموعی رقبہ 78 مربع میٹر ہے جس کی بناوٹ کو دیکھ کر اس کے تاریخی ہونے کا بخوبی اندازہ ہوتا ہے۔
مسجد کی اندرونی دیواروں کو علاقے کی چکنی مٹی کی تہہ چڑھائی گئی ہے جبکہ محراب کو بھی اسی طرح تعمیر کیا گیا ہے جس طرح اسے روز اول بنایا گیا تھا۔
مسجد کی دیواروں میں بنے طاقچوں اور ہوا کی آمدورفت کے لئے دریچوں کی بناوٹ بھی اسی طرز کی ہے۔اسی طرح مسجد کے صحن میں وضو کی سہولت کے لئے نلوں کااضافہ کیا گیا تاکہ وہاں آنے والوں کو دشواری کا سامنا نہ کرنا پڑے۔
Short Link: https://urdu.app.com.pk/urdu/?p=576045
