کوالالمپور۔28مارچ (اے پی پی):چیئرمین سینٹ سید یوسف رضا گیلانی انٹر پارلیمنٹری سپیکرز کانفرنس کیلئے کوالالمپورپہنچ گئے ، وہ انٹر پارلیمنٹری سپیکرز کانفرنس کے شرکاء سے خطاب کریں گے۔سینیٹ سیکرٹریٹ سے جاری اعلامیہ کے مطابق چیئرمین سینیٹ سینیٹر سید یوسف رضا گیلانی نے ملائیشیا دورے کے دوران شیخ عفیف الدین جیلانی سے ملاقات کی۔ ملاقات میں عالمِ اسلام کو درپیش چیلنجز اور مسلم دنیا کے اتحاد پر تبادلہ خیال کیاگیا۔
شیخ عفیف الدین جیلانی نے چیئرمین سینیٹ سید یوسف رضا گیلانی نے بغداد میں حضرت عبدالقادر جیلانیؒ کے مزار پر حاضری کی دعوت دی۔چیئرمین سینیٹ سید یوسف رضا گیلانی نے کہا کہ اسلامو فوبیا کے خاتمے اور بین المذاہب ہم آہنگی کے فروغ کے لئے مشترکہ کوششوں کرنا ہوں گی۔ انہوں نے کہا کہ شیخ عفیف الدین جیلانی کا اسلامی اقدار اور رواداری کے فروغ میں کلیدی کردار ہے۔
سید یوسف رضا گیلانی نے کہا کہ امت مسلمہ کو درپیش عالمی چیلنجز کے حل کے لئے موثر اقدامات کرنا ہوں گے۔ انہوں نے کہا کہ عالم اسلام کو درپیش چیلنجز کے حل کے لئے اجتماعی کوششوں کی ضرورت ہے، شیخ عفیف الدین جیلانی کا علمی و روحانی تجربہ امت مسلمہ کے لئے اثاثہ ہے۔
انہوں نے کہا کہ بین المذاہب ہم آہنگی کے فروغ میں شیخ عفیف الدین جیلانی کی خدمات قابل تحسین ہیں،بغداد میں حضرت عبدالقادر جیلانیؒ کے مزار پر حاضری میرے لئے سعادت ہو گی۔چیئرمین سینیٹ نے کہا کہ عالمی سطح پر مسلمانوں کے خلاف منفی پراپیگنڈے کے تدارک کے لئے مل کر کام کرنا ہوگا، امت مسلمہ کی فلاح و بہبود کے لئے مشترکہ جدوجہد جاری رکھنے پر اتفاق کیا گیا ۔
Short Link: https://urdu.app.com.pk/urdu/?p=577044
