اسلام آباد۔28ستمبر: چیئرمین سینٹ میاں رضاربانی نے موجودہ دور کو پارلیمانی سفارتکاری کا دور قرار دیتے ہوئے کہا ہے کہ مسائل کے حل کے لیے قوموں کے درمیان بہتر تعلقات کو پارلیمانی سفارتکاری کے ذریعے فروغ دیا جاسکتا ہے، پاکستان اور بحرین کے مابین دوستانہ تعلقات ہیں اوردونوں ممالک کے درمیان تجارتی و اقتصادی سطح پر وسعت دینے کی گنجائش موجود ہے۔ ان خیالات کا اظہار انہوں نے بحرین کے پارلیمانی وفد کے سربراہ اور بحرین کی شوریٰ کونسل کے چیئرمین علی بن الصالح سے پارلیمنٹ ہاوس میں ملاقات کے دوران کیا۔ اعلیٰ سطح ملاقات میں ڈپٹی چیئرمین سینٹ مولانا عبدالغفور حیدری، سینیٹ میں قائد ایوان راجہ محمد ظفرالحق، سینٹ میں پاکستان بحرین دوستی گروپ کے سربراہ حافظ حمداللہ ، سینیٹرز ڈاکٹر جہانزیب جمالدینی ، اعظم خان سواتی، محمد طلحہ محمود، مشاہد حسین سید اور ستارہ ایاز موجود تھے۔ بحرین کا پارلیمانی وفد چیئرمین سینیٹ میاں رضاربانی کی خصوصی دعوت پر پاکستان کے دورے پر ہے۔ میاں رضاربانی نے وفد سے ملاقات کرتے ہوئے کہا کہ مسلم ممالک کی پارلیمان کو اُمہ کو درپیش مسائل کے حل کے حوالے سے ٹھوس اقدامات اٹھاتے ہوئے جامع حکمت عملی اختیار کرنا ہوگی تاکہ مسلم ممالک میں سماجی و اقتصادی ترقی کے عمل کوتیز ترکیا جاسکے اورترقی اور خوشحالی کے لیے ملکر جدوجہد کی جائے۔
Short Link: https://urdu.app.com.pk/urdu/?p=71512
